Naiwieng 13: Ka lahduh jong ka Meghalaya State League, kata ka Rangdajied United FC hynne ka sngi ka 13 tarik Naiwieng, ka la sdang ïa ka lynti ïaid ha ka kyrdan ïakhun 3rd Division I-League da ka namjop kaba i shongkun, ha kaba ka la pynjemkhnap ïa ka Millat Football Club haduh 5 kol ha ka jingïalehkai kaba la pynlong ha madan phutbol jong ka Dempo Accademy.
Haba phai sha kane ka jingïakhun, la sakhi ïa ka jingtbit bad ïa ka sap kaba kyrpang jong kine ki rangïalehkai ba ka kynhun ka la sei baroh napoh ka jylla.
Kumban shu kdew, ka Rangdajied United FC ka la lah ban tehlakam kham bun shah ïa ka bol haba nujor bad katei ka kynhun kaba napoh Mumbai, ka Millat FC. Ka kynhun ka la ïoh ban lamkhmat 2 kol ha kaba kut jong ka kylla step, bad ka jingïaroh ka long sha u Owanijuh Pajuh u ba la seisohbha bad buh shakhmat ïa ka kynhun da kaba thep ïa baroh ar kol (16 bad 34 minit) shuwa ban kut ka kylla kaba nyngkong.
Ka jingïakhun ha ka kylla miet, ka la kham slem khyndiat ïa ka rangïalehkai ka Rangdajied ban ïoh pynkhihjar tad ynda la jam sha ka 76 minit ba u Damehun Syih u la ïoh ban thep ïa ka kol kaba lai.
Watla ka kynhun ka la thikna ban khur ïa ka namjop hadien ba la lamkhmat haduh 3 kol, ki player ka Rangdajied kim shym la shongthait bad ïai bteng ban ñion bad dei ha ka khyllipmat ba la pynjlan ïa ka por jong ka kylla miet ba ka Rangdajied ka la pynbud sa ar kol, kata ha ka minit 90+2 ba la thep da u Oresterwel Langshiang bad ha ka 90+5 minit na u Stephanson Pale.
Ka Rangdajied United FC kan sa ïakhun biang lashai ka sngi (15 tarik Naiwieng) pyrshah ïa ka Kickstart FC ha kajuh ka madan.
