Sien banyngkong yn aireng ka Shillong Lajong bad ka Sreenidi Deccan FC ha ka I-League

Shillong, Naiwieng 13: Ka Shillong Lajong FC kan pyndep ïa ka prokram lehkai I-League hala ïing kaba ar mynta ka Sngi pyrshah ïa ka Sreenidi Deccan FC kaba dei ka kynhun napoh Hyderabad, bad ka jingïalehkai kan sdang ha ka por 2 baje nohphaisngi ha madan SSA Stadium-Polo, Shillong.
Hadien ba ka kynhun ka la mad ïa ka nam ïakhaid ha ka jingïakhun ba ladep pyrshah ïa ka Neroca FC, ka Lajong mynta kan hap ban aireng pyrshah ïa ka kynhun ba khlaiñbor, ka Sreenidi Deccan FC, ka kynhun kaba la jop 2 sien lynter, da kaba pynliem ïa ka Neroca FC da 4 ha ka jingïakhun kaba nyngkong bad ïa ka Inter Kashi da 4-1 ha ka prokram ïakhun kaba ar.
Shuh shuh, ka Sreenidi Deccan FC ka la mad namrem dei tang ha ka Aizawl FC ha ka jingïalehkai kaba dang shen bad mynta ka ïeng ha ka kyrdan ba lai jong ka miej da 6 point naki 3 sien ïakhun.
Haba ai jingkren shuwa ban jam sha ka sngi ïakhun, u head coach jong ka klob Sreenidi, u Carlos Vaz Pinto u la pynpaw ba ka kynhun ka jong u ka long kaba la khreh na bynta kane ka jingïakhun pyrshah ïa ka Lajong bad ka kynhun ka la khmih sani bha ïa ka rukom lehkai jong kiwei hadien ba mad ïa ka namrem hala ïing. U la bynrap ruh ba kane ka jingïakhun kan nymlong kaba suk naba ka Lajong kan ïalehkai hala ïing.
Haba phai pat sha ka Lajong, ka kynhun kam pat shym la shahrem hynrei ha kajuh ka por kam pat shym la ïoh ka resol kaba seisoh naba ïakhaid ha baroh ar sien ki jingïakhun ba ladep.
Ka kynhun ka la sdang da kaba ïakhaid bad ka Mohammedan SC shabar nala ïaing nangta ïakhaid da mar 1-1 kol bad ka Neroca FC hala ïing, bad mynta ka ïeng ha ka kyrdan ba 10 ha ka miej da 2 point.
Shuwa ban jam sha ka sngi ïakhun, na ka liang jong u Head Coach ka Shillong Lajong, u Bah Bobby Nongbet u la ong ba ka kynhun mynta ka khmihlynti ban khur beit ïa ki lai point pyrshah ïa ka Sreenidi FC. Hadien ba ïakhaid bad ka Neroca, u la kyrmen skhem ba mynta ka sngi ngin sakhi ïa ka jingtrei shitom ki rangïalehkai bad ban pynthikna ïa ki 3 point mynta ka sngi hala ïing.
Kane ka dei ruh ka sien kaba nyngkong ïa kine ki ar kynhun ban ïatyngkhuh pyrshah kawei ïa kawei ha ka history jong ka lympung I-League bad la khmihlynti ïa kane ka jingïalehkai ba kan long kaba shongshit bad kaba itynnat.
Ka Sreenidi Deccan ka dei kawei na ki kynhun ba khlaiñbor ha kane ka samoi ba mynta jong ka I-League ba la ïalam da u Coach napoh Portugal, u Carlos Vaz Pinto, bad ka dei ka kynhun kaba wan kyrdan ba ar ha ka samoi ba ladep. Kane ka lah ban long ka jingïakhun kaba jwat ïa ka Lajong bad donkam ïa ka ban sei madan ïa ka sap ba kyrpang ban ïoh ïa ka jingjop. Na bynta ki ticket ïa ki nongpeitkai, ki lah ban ïoh napoh ticket counter jong ka SSA Stadium.