Da ka Mawlai Open Arm Wrestling Championship yn pynlong ka HS&CC
Ym shah shuh ïa ki nongjop ha ka State Championship
Shillong, Naiwieng 28 : Ka Hynñiewtrep Sports and Cultural Club (HS&CC) kaba dei ka kynhun na Mawlai kan sa pynlong ka jingïakhun kti kaba la tip kum ka Mawlai Open Arm Wrestling Championship 2022 (Men’s and Women’s).
Ïa katei ka rynsan ïakhun kti yn pynlong ha Polytechnic Auditorium Hall kaba don ha Mawlai Kyntonmassar kaban sdang ha ka 3 tarik Nohprah naduh ka por 11 baje mynstep. U Bah P. Nongrang President jong ka HS&CC haba kren sha ki lad pathai khubor hynne ka sngi Nyngkong ha Shillong Press Club u la ïathuh ba kane ka rynsan ba mynta u snem kadei ka sien kaba saw.
“Ngi la sdang ban pynlong ïa kane ka rynsan tang na bynta ki nongïalehkai kiba don hapoh u pud u sam jong ka shnong Mawlai hynrei hadien ar snem ba la shah pynthut ha ka khlam Covid-19 ngi la sdang da kaba pynlong da ka Mawlai Open Arm Wrestling bad ngi khot sngewbha ïa baroh ki nongïalehkai kiba don hapoh ka jylla ba kin wan ban ïashim bynta ha katei ka championship.”
U la ïathuh ruh ba ka bairung kan dei 200 tyngka bad ka kynhun ka la pynkhreh ïa ki nongjop da ka song pisa ha ryngkat ki takma. Shuh shuh u Bah P. Nongrang u la ong ruh ba ha kane ka Championship yn ym shah shuh ïa kito kiba jop kyrdan ba nyngkong bad ba ar ha ki State Championship. “Nga pyntip ruh hangne ba ïa kito kiba jop kyrdan ba nyngkong bad ba ar ha ka State Chmpionship ngim shah shuh hynrei ngin ailad ïa kiwei pat ba kin ïashim bynta,” ong u Bah P. Nongrang.
Shuh shuh u la ïathuh ruh ba ha ki laisien ba ka kynhun ka la pynlong ïa kane ka rynsan ki nongïalehkai ki la sdang ban sngewtynnad ha kane ka jingïakhun kti kumta ka pynlong ïa ka kynhun ban sdang biang ban pynlong khnang ban ai mynsiem bad ban dang kyntiew shaphrang ïa ki samla kiba donsap ha kaba kum kane ka jait jingïalehkai.