Da ka madan ïalehkai kriket ba la pynbha ïoh ka St. Anthony’s Shillong

Shillong, Risaw 06 : Ka Meghalaya Cricket Association hynne ka sngi ka la plie ïa ka madan ïalehkai kriket kaba la shna pynbha ha St Anthony’s Mini Stadium, Shillong
Na ka liang ka MCA hapoh ka jingïalam jong u Secretary Bah Gideon Kharkongor ryngkat kiwei pat ki la trei borbah na ka bynta ban pynbha shuh shuh ïa ka St Anthony’s School Cricket Academy da kaba pynbiang sa ïa ki jar bad ruh ban pynbha ïa ki jaka praktis nalor kiwei kiwei. Katei ka academy ka ai jinghikai ïa baroh ki samla pule na kylleng ki jaka pule kiba don ha nongbah Shillong.
Na ka liang ka St Anthony’s HSS kaba don la ka jong ka history haba ïadei bad ka kriket la mihkhmat hynne ka sngi da u Vice Principal, Fr. Anthony Wahlang uba la pynpaw ïa ka jingsngewnguh kaba khraw ïa ka MCA kiba la shimkhia ban pynbha shuh shuh ïa katei ka jaka praktis.
U ong ruhba katei ka sienjam kan plie lad bad mait lynti na ka bynta ki samla pule kiba sngewtynnad ïa katei ka jingïalehkai ban ïoh mynsiem shuh shuh.
La ïoh ruh ïa ka jingkren na u Secretary ka MCA uba la pynkynmaw ïa ka jingïadei kaba jan hapdeng ka synjuk bad katei ka skul haba ïadei bad ka jingïalehkai kriket.