Mynta ba la jan ka elekshon shen ki jingpan RTI ka jingpynbna ïa ki jinglap ïa ki jingtip lyngba ka RTI kin saphriang kylleng la ka long lyngba ki lad pathai khubor lane lyngba ki bor social media. Kane kadei ruh shi bynta ban pyntip sha ki paidbah ïa ka rukom treikam jong ki nongmihkhmat ha kine ki san snem kum ki MLA. Ha kawei ka liang dei ban ïaroh ïa ki briew kiba pyndonkam ïa kane ka rynsan ban pyntip ïa katei ka rukom treikam ki nongmihkhmat tangba ha kawei pat ka liang katei ruh kadei shi bynta ban plie lad ïa ki kyrtong ba ïakhun pyrshah ban wad daw ne wad lynti ban ïoh kynthoh ïa ki jingduna jong u kyrtong uba kin ïa khun pyrshah.
Ka jingwad ïa ki jingtip lyngba ka RTI kan ïarap ruh ban tip paidbah shaei ki skim jong ki MLA ka poi, hato ka poi tang sha ki bahaiing ha sem lane ba ïa jan bad ki nongïalam ba hakhmat jong ki MLA lane ki da jied shisha ïa kiba dei hok ban ïoh. Lada ki nongwad RTI ki lap ïa kum kitei ki jinglap dei ban sei pyrthei bad ruh ban khyrwit tyngeh khnang ba ki nongshong shnong kin ym shah knieh noh ïa ka hok ba ki dei ban ïoh na ki nongmihkhmat tang na ka jingdon jong ki katto katne ki nongïalam shim kabu.
Bunsien ka jingrem jong ki MLA ruh kadei beit na ka rukom treikam jong kitei ki nongïalam kiba ha ka jaka ban bat ïa ki nongkyrshan hynrei ki pynpra pynban phum tang na ka jingbym lah ban jied ïa ki nongïoh jingmyntoi kiba dei hok ban ïoh. Dei ruh lyngba katei ka rukom jied ïa ki nongïoh jingmyntoi kaba ktah ruh ïa ka jingïapait wat hapdeng ki nongshong shnong kaba ju poi haduh u pud ba dei ka politik kaba pynpait shnong pynpait thaw.
Bunsien ki ju ong ba dei lyngba ka jingwad jingtip lyngba ka RTI ba lah ruh ban sei pyrthei ïa kata ka bamsap kaba ju mih bha ha ki rynsan ïalap elekshon khamtam ha kito ki khyndiat bnai shwa ban thep vote artad.
Hynrei lada kren pat ïa ka jingshisha, ym lah ban tip ba haduh katno ngut kiba sngewthuh ïa ka jingmut jong ka kam bamsap la ka long ha ka jylla ne wat ha ka ri? Bunsien la ju ïohsngew ba ki paidbah na ka por sha ka por ki ju ïakren shaphang kata ka kam bamsap bampong la ka long ha ki shnong ki thaw, ha ki District ne wat ha ka jylla ne ka ri, hynrei bunsien ka jingïakren ka la shu kut tang ha ka lyer bad kim sngewthuh pat ïa ka jingmut ba shisha jong ka kam bamsap.
Haba kren shaphang ka kam bamsap bunsien ruh ka ju mih kata ka jingkynnoh tang ïa ki nongmihkhmat kata beit beit tang ïa ki MLA lane ki MDC bad teng khat ïa ki ophisar sorkar, hynrei haba bishar bniah pat ïa kane ka kam bamsap mynta ka la rung lut ha baroh ki bynta kata naduh ki kam shnongkam thaw, ki kam ïing kam sem, kam seng bad kiwei kiwei, kaba la pyntroiñ shisha ïa longbriew manbriew ha ka jylla bad ka thaiñ hi baroh kawei.
Katei ka jingsahdien hi kadei namar ka don ka daw tynrai, kata ka bamsap ha ki bun rukom, da ka pisa, da ki kam, da ki jingïa pyrshah bad kiwei kiwei kiba long thik kum ki thliem kiba kjit bad bam klop ïa ka hok jong u paidbah ba ka sorkar jylla ne sorkar pdeng ka la ju ïarap kyrpang lyngba ki kam pynroi jong u paidbah.
Sngew sangsot ban phai sha ki jaka nongkyndong kiba hap mad tang da ki jingeh suda ha ka jingim kata naduh ka jingduna ki umbam umdih, ki lynti ki synkien, ka koit ka khiah bad kiwei kiwei pat ki kam pynroi ha kaba la ju ïa kynnoh ba dei namar ba don kata ka jingbamsap ïa ka hok u paidbah.
Ha kawei ka bynta, ka jingkren ba sahdien ki kam pynroi ka dei na ka daw ka jingdon jong ka kam bamsap ka long kaba don nongrim, hynrei ban ong pat ba ka dei 100 persen tang na ka daw ka bamsap ka dei ka kam ka bym lah ban pdiang namar bunsien wat ki paidbah ruh ki ngop ha ka kam bamsap ha kaba kim ju pyrkhat ïa lade ba ki bamsap hynrei ki kloi ban kdew pat ïa ki nongmihkmat bad ki ophisar sorkar.
Lah ruh ban kdew shai hangne ba ka kam bamsap mynta ka la rung ha man la uwei pa uwei u briew khamtam ha ka por elekshon ba ki paidbah ki ju biej ïa ki sbai rupa kaba ki ju ïoh tang ha ka shi khyllipmat jong ka por elekshon hynrei ynda la kut katei ka aïom ksiar pat ki ju lynñiar ba duna kane katai kaba dei na ka jingleh bakla khlem da bishar bniah shuwa ban kner ïa ki Kti.
Hap ruh ban kynnoh ba ka kam bam sap mynta ka la rung ha man la uwei pa uwei u briew kaba ngim da donkam ban shu kynnoh ne ban pynkitpap tang ïa kiwei bad lada ki paidbah ki sngewthuhshisha ba ka kam bam sap ka ktah ïa ka imlang ka sahlang bad ka roi ka par upaidbah ka la dei ka por ba ki hap ban ïa pyrkhat arsien na ka bynta ban shim ïa ka jingkitkhlieh hynrei ki dei ban pyrkhat ba ïa katei ka kam donkam ban rat dyngkhong shuwa ïa lade shimet bad nangta sa peit ïa kiwei.
