Da ka Kynhun SIT thung ka sorkar ban tohkit halor ka jingbthei bad pra ka met u nongthiah pang ha Smit

Shillong, Naitung 04 : Ka Tnad Meghalaya Police mynta ka sngi Ba-ar ka la pyntip ba ka la thung da ka kynhun Special Investigation Team (SIT) ba kan tohkit ïa ka jingmih ka jingbthei ba ïasyriem kum ka jingbthei bomb hynnin ka Lah Sngi U Blei ha Lumkynsai, Smit, kaba la shim ïa kawei ka mynsiem briew.
U Superintendent of Police (SP) ka East Khasi Hills Bah Sylvester Nongtnger ula pyntip ba ïa kane ka SIT yn khlieh da u Superintendent of Police (City) Bah Vivek Syiem.U pyntip ruh ba ka tnad Pulit ka la register da ka Suo-Moto FIR hapoh ka Madanrting Police Station halor kane ka jingjia.
Hynrei, u SP ula kyntait ban batai ïa kiei ka daw kiba lam sha kane ka jingbthei haba ong ba ka tnad kan sa pyllait ïa ka kyrwoh hadien ba ka SIT kala aiti ïa ka kaiphod jingtohkit.
Lah ban kdew hangne ba ka jingbthei kaba jam bha kala jia ha kawei ka ïing ha Lumkynsai, Smit kaba hap hapoh ka Madanrting Police Station bad uwei u briew ba kyrteng u Pynsuklang Khongwir ula khlad hadien ha kane ka jingbthei.
La suba jur ba kane ka jingbthei ka lah ban dei na ka jingbthei ka tusok elektrik kaba la pynjulor ïa katto katne ki kamra jong ka mala ba nyngkong kane ka ïing.
Hynrei u SP ha ka kyrwoh ba pyllait hynnin ka sngi nyngkong, ula pyntip ba ha ka jingtohkit ïa kane ka jaka ba mih ka jingbthei, ki pulit ki la ïohtam ïa ki lyngkhot lyngkhai kiba dei ki thymmei ba pynmih ia ka jingbthei. Ula pyntip ruh ba ka kynhun Bomb Squad bad ka CSU ki dang pynthikna ïa ki daw jong ka jingbthei.