Da ka kyndon 144 pynjari u District Magistrate ka Eastern West Khasi Hills na ka bynta ki nongdie doh

Shillong, Naitung :U District Magistrate ka Eastern West Khasi Hills District shibynta ban bud ryntih ïa ka hukum ba la pymih da ka ïingshari High Court ka Meghalaya na ka bynta ka PIL No. 2 jong u snem 2021 kaba ha ka 26 tarik u Jymmang mynta u snem, u la pynmih hukum hapoh ka Section kaba 144 jong ka CrPC ka ba khang pyrshah ïa ka jingbuh ne jingwah pathar ïa ka doh khlem kano kano ka jingda, jingtap ne jingker kiba biang da ki nongdie doh kiba ju die doh hapoh ka distrik.
Na ka liang u District Magistrate u la ong ba kane ka jingbuh bad jingwah pathar ïa ka doh da ki nongdie doh ka lah ban wanrah ka jingjaboh jong ka doh lyngba ki pumpum bad ka lah ruh ban pynsniew ïa ka doh kaba lah ban wanrah kylla ïa ki jingpang sha ki nongbam ïa ka.
Kumta ruh la pynmih ïa kane ka hukum kum shibynta ban pynthikna ba la leh bha bad leh thikna ïa ka rukom ot bad rukom buh ïa ka doh da ki nongdie doh bad ka rukom ri ïa ki mrad da ki paidbah kiba ju ri ïa ki, kaba kynthup ruh naduh ka rukom kit rukom bah ïa ki mrad ban ri lane ban bam doh.
La kyntu ruh ïa kino kino ki nongshong shnong kiba shah ktah ha katei ka hukum ki lah ban leit mih sha ki bor ba dei khmih halor kane ka bynta, bynrap shuh shuh ka hukum jong u District Magistrate (SDPRO, Mairang).