Shillong, Naitung :Ka Reserve Bank of India, Shillong ha ka 26 tarik mynta u bnai ka la pynlong ïa ka prokram aijinghikai ha kaba ïadei bad ki jingnang jingtip bad ka jingshim rai halor ki rukom pyntreikam ïa ki pisa pilain ne ‘Financial Literacy Event’ hapoh ka Dorbar Hall jong ka shnong Mawkawah Village, Nongstoiñ, WKHD.
ïa kane ka prokram la plie da u Bah Olden Nongpluh, General Manager bad Officer-in-Charge (GM(O-i-C)), Reserve Bank of India, Shillong ha kaba la wan ïashim bynta lang ruh da u GM(O-i-C), NABARD, ki heh na ka ophis BDO Nongstoiñ Block lem bad kiwei pat ki heh na ki bank kiba treikam ha katei ka thaiñ.
Ha kane ka prokram na ka liang u GM (O-i-C), RBI bad u GM(O-i-C), NABARD ki la ai ka jingkren sha ki nongwan ïashim hynta halor kiba bun ki mat bad halor ki jingmyntoi lyngba ki bank kumjuh ha kaba ïadei bad ki jingtreikam kiba ïadei bad ki kam pisa pilaiñ.
Na ka liang u heh ka RBI Shillong u la ai ka jingpynshai sha ki nongïashim bynta halor kiba bun jait ki lynti kiba shngaiñ bad ïa kaei kaba ki dei ban leh bad kaei kaba kim dei ban leh ha kaba ïadei bad ka jingshngaiñ jong ki digital banking, ka jinglah ban shah thok jong ki customer ha ki kam pisa, ki jingujor ha ki jingtreikam jong ki bank bad halor ki digital transactions, kum kaUPI, BHIM, USSD, bad kiwei pat.
Ha kane ka jingïalang la ïoh ïa ka jingkren pdiang sngewbha na u bah Olden Nongpluh, General Manager bad Officer-in-Charge (GM(O-i-C)), Reserve Bank of India, Shillong ha ka jingïadon ryngkat lang jong kumba 160 ngut ki nongrep, ki dkhot na ki SHG, ki nongtreikam lajong bad kiwei kiwiei.
Ha kane ka sngi la aiti haduh 18 tylli ki shithi ba la mang ban ai ram kaba la kot sha ka T.1.08 klur lyngba ki bank kiba treikam ha kine ki thaiñ sha ki nongïoh jingmyntoi.Nalor kata ki katto katne ki bank ki la buh ruh ïa ki counter na ka bynta ka Social Security Schemes bad ka jaka kylliang pisa na ka bynta ka jingmyntoi jong ki nongïashim bynta.
