Shillong, Naitung 27: Ka Federation of Khasi Jaintia and Garo People (FKJGP) ka la ai ka jingkyrshan ïa ka rai jong ka Khasi Hills Autonomous District Council (KHADC) ban bsut bad pynrung ïa ki kyndon ain pykhing mynder ha ki aiñ ba la don lypa jong ka Council.
Na ka liang ka FKJGP hapoh ka jingïalam u president, u Bah Dundee C Khongsit hynne ka sngi ki la leit ban ïakynduh ïa ka Executive Committee bathymmai ha KHADC, ha kaba ka la wad jingshai shuh shuh halor katei ka rai.
U Bah Dundee u la ong ba ïa kano kano ka jingthmu ban wanrah ïa ki aiñ ban ïada ïa ka jaidbynriew ka seng ka sngew dei ban ai ka jingkyrshan, bad pynpaw ba ka seng ka shim khia ïa kane namar ka jingma ka ap lada kum ka jaidbynriew ka shah rem noh ha ka synshar khadar.
“Hynrei ngi sngewkhia ban ïohi ba briew kiba dang shu wan tang khyndiat sngi ki la ïoh ban pynrung kyrteng ha ki electoral roll,” u la ong.
Nalorkata, u ogn ruh ba ka jingma kaba ap mynta ïa ka Jaidbynriew ka long ba lada shah rem noh ha ka khaii pateng bad ha ka ïoh ka kot. “Kumta na ka liang ka seng ngi la kren ïa u CEM ba ym dei shuh ban ai Trading Licence thymmai shuh sha kiwei pat ki jaidbynriew.”
Utei u nongialam ka FKJGP u la ïathuh ruh ba kum ka Seng ki la kyntu ruh ïa ka Council katkum ka bor ba ka don ban bthah ïa ki Rangbah Shnong ban pynmih ïa ki kyndon aiñ kiba khlain ban ïada ïa ki samla na ka jingsniew jong u drok bad ban ïada ruh ïa ka jingïoh rung ïoh mih pathar kiwei ki jaidbynriew ha ki shnong ki thaw.
