Kurup ki Pulit EJH haduh 69.196 kilo u Kynja, shah kem 3 ngut

0

Khliehriat, Naitung 27 : Ki pulit jong ka East Jaiñtia Hills ha ka sngi Palei, ki la ioh ban kurup haduh 69.196 kilo u kynja na kawei ka kali Swift ha ka lynti surok NH-06 ha ka shnong Kongong. Ha kane ka jingjia, ki pulit ki lakem noh ruh ia lai ngut ki briew ba suba donkti.
Haba pyntip ia kane, u Superintendent of Police, DSB, ka EJHD u Jagpal Singh Dhanoa, IPS u la ong hadien ba katei ka jingioh kurup ia utei u drok tyngkat bad kitei kiba suba donkti kadei hadien ba ki la ioh ia ka jingtip kaba tikna bad kumta ki la pynap shrip ia ki ha surok Kongong.
La iathuh ba kitei ki lai ngut ba shah kem ki kynthup ia u Mintu Das, Bijay Kr. Ray bad u Arvind Kumar kiba dei na Assam ki la wan da ka kali Swift Dezire hynrei mar ia poi ha Kongong ki pulit ki la ioh bat noh bad na katei ka kali ki la ioh ban kurup haduh 91 song u drok.
Shuh shuh la iathuh ruh ba na kitei ki lai ngut la ioh ruh ban kurup haduh lai tylli ki mobile phone. Kumta na ka liang ki pulit ki la rejistar mukotduma ia katei ka jingjia ha Khliehriat PS bad ka jingtohkit ka dang iaid shakhmat.

Leave A Reply

Your email address will not be published.