Nongpoh, Nailur, 10: Shibynta ban ai mynsiem ïaki khun samla kiba la pass bha haki eksam bapher bapher ka Seng Samla Umsning Patarim haka sngi Saitjaiñ ka la pynlong daka jingpynkup burom ïaki khun samla jong ka shnong kiba la pass bha haki examin SSLC, HSSLC, Degree bad kiwei kiwei ki ba wan shakhmat haka result jong u snem 2022-23.
Ha kane ka sngi la wan ruh ban pynshngaiñ ïa katei ka prokram da u MLA ka Umsning Dr. Celestine Lyngdoh, Bah Rocky Marweiñ Rangbah Shnong Umsning Proper B, Samla Charles Kylla President ka Seng Samla, Bah Marcus Marten President HNYF Northern Region, Bah James Hitler Mawphñiang General Secretary KSU NKHD, Pastor David Jamir, Bah Kennet Nongsiej, Officer In-Charge Umsning Police Station, Rangbah Shnong bad Secretary Shnong Umsning Patarim, Seng Longkmie bad kiwei kiwei ryngkat bad 16 ngut ki samla kiba la shah pynkup burom ha katei ka sngi.
Ha katei kajuh ka sngi naka liang ka Seng Samla Umsning Patarim kala shim ruh ïaka lad ban pynsngew pynsngap sha ki khun samla khamtam kitei kiba dang pass haki jingpule bapher bapher halor ka jingktah bad ka jingma u drok u ba la ktah shi katdei ïaki khun samla ha kane ka juk kaba mynta lada kim long kiba phikir ïala ka jong ka jingim bad halor katei ka bynta u Pastor David Jamir bad u Bah Kenneth Nongsiej OC ka Umsning PS kila ai ka jingbatai kaba shai sha kitei ki khun samla ba ki dei ban kiar lai lum lai wah na kitei ki jait jingdih kiba sniew kiba ktah ïaka koit ka khiah, ka ïing ka sem bad ka imlang ka sahlang hi baroh kawei.
Naka liang u Dr C Lyngdoh kum u kongsan haba kren ha katei ka sngi u la ai ka jingïaroh kaba khraw ïaka seng Samla Umsning kaba la shim ïaka sienjam ban pynkup burom ïaki khun samla ka shnong kum shibynta ban ai mynsiem ïaki bad ban long ruh ka nuksa sha kiwei pat ki khun samla bad ki heprit kiba dang bud nadien haki jingpule, namar ka jingnang jingstad ha kane ka juk ba mynta ka dei ka atiar jong ka lawei.
U la kyntu ruh ïaki khun samla ha katei ka sngi ba kin nang trei shitom bad nang leh bha shuh shuh haki jingpule ba kham shalor, ban leh tipsngi ban kohnguh ïaki kmie ki kpa bad ïaid haka akor ka burom khamtam ban kiar naki paralok kiba ïalam sha ka lynti kaba bakla, hynrei ban jied ïaka lynti kaba dei khnang ba kin poi sha ka thong haka jingim jong ki kumba ki angnud.
