Nongstoiñ, Nailur 10: Kumba 80% na ki paitbah nongshong ha West Khasi hills ki dei kiba im da ka rep ka riang bad ki shong ki sah ha ki nongkyndonghynrei katba nang ïaid ki snem ka rep ka riang ka la nang syrtok namar ka jingkylla ka mariang bad ka jingbym ïaid beit shuh jong ki aïom ha ka snem.
Ha ka jingleit jurip jong u nongthoh khubor ha kiba bun shnong kylleng ka distrik, la lap ba ki don ki nongshong shnong kiba tang na ka daw jong ka jingbym biang shuh ha ka rep ka riang ki ïabeh ban shu shong wai ha ïing ki briew. Nalor kata man la ka sngi ki im da kaba leit bylla katba ïoh na ka bynta ban pyndap ïa ki jingdonkam jong ki khun ki kti.
La lap ruh ba kito kba kham bun khun lei lei ki shem jingeh haduh katta katta ban pynbiang, khamtam eh lada ki khun ki leit skul namar ba ki kmie ki kpa ki hap ban ïabeh ban leit bylla. Nalor kata kaba kham sngewsih ka long ba teng teng ki don ki khun kiba ngop ha kiba bun ki kam sniew bad ki kam jahklia tang na ka daw jong ka jingïakynduh ïa ki paralok kiba im ha kiba kum kitei ki kam.
Haba phai pat sha ki jaka ba ki nongshong shnong ki dang pahuh ki jaka ban rep ban riang bad ki jingthung jingtep kum ki soh ki pai, u kwai u tympew, ka kait ka shriew, u synsar bad u sying, ki paitbah kim ju khuslai ne pyrwa hynrei ki trei shitom bad minot thop ha la ki kam ki duk man la ka sngi.
U bah T.Riangtem uwei na ki rangbah na ka shnong Myndo kaba hap ha ka Mawshynrut C&RD Block, u la ong ba ki paitbah nongshong shnong kitei ki thaiñ ki don kyrhai ki jaka ki puta, ki kper ki phrah ban rep ban riang. Hynrei ha kine ki lai snem tam ki la shem jingeh haduh katta katta, namar bun ki mar rep ki la ïoh ïa ki jingpang bapher bapher kata naduh u sying, u kwai, ki diengsoh bad kiwei kiwei ki mar rep ha kaba ki la shem shitom ban sumar na ban ïada na kitei ki jait jingpang.
Nalorkata ki pait nongshong shnong naduh Umsohpieng, Mawjiej, Nongpdeng, Mawleiñ bad kiwei kiwei kiba khlaiñ bha ha ka rep sying, kwai, tympew, kait, soh bad kiwei kiwei, ki la ong ba ka jingeh ka dei ka jingbym biang jong ka ïew ka hat da kaba ai nuksa ba ha u snem ka dor jong u sying ha ïew Hahim, ka poi tang shiphew tyngka shi kilo bad shi mon u poi tang sawspah tyngka, kata ruh u sying uba bha lada dei uba kham rit lei lei ym don ba thied satia bad lada leit die tang ka bai kali ruh ym mih shuh. U kwai uba dei u mar rep u ba shisien ba la thung u neh da ki spah snem hynrei ha kine ki snem u la sdang ïap khlam lut.
Shuh shuh, la ong ba ki la ju ïoh sngew ba ki don shibun ki saïantis kiba dei ha ka laiñ jong ka rep ka riang bad ka thung ka tep, hynrei kim ju ïohi pat ba ki wan tur sha ki nongkyndong ban ai jinghikai ïa ki nongrep lane ban eksamin ïa ka jingïap khlam u sying bad ki dieng kwai. Ki la ju ïohsngew ba kitei ki stad saïan ha ka rep ki ju wan ai jinghikai tang ha ki ja ka sor bad ka jingwan ai jinghikai ïa ki nongsor kam don jingmut. Imat ba kitei ki saïantis kim kwah shuh ban dang ktah khyndew kum ki nongrep.
Ki la ong ruh ba ki nongkyndong kiba im ha ka rep ka riang kim don por satia ban leit pynlut ïa ka sngi ha sor nalor ba ki shnong ki long kiba jngai ka bai leit bai wan ka la ktah, ki la duh ruh ïa ka trei ka ktah. Ki la kyntu ïa ka sorkar ba jan phaikhmat lem sha kitei ki shong ka thaiñ Nongtrai ba kan phah ïa ki riew shemphang ha ka kam rep kam riang, ba kin wan pynshai ïa ki nongrep kumno ban thung bad kumno ban ïada na ka jingïap khlam jong ki mar rep khnang ba ka rep ka riang kan kiew.
