Mynta ka snem ka Khasi National Dorbar ka dap 100 snem. Watla kam shym la lah ban treikam bha lymne lum ïa ki Dorbar katkum ba la pruid dak ha ka Rule, Ka Khasi National Dorbar ka la lah ban pynlong ïa ka jingrakhe dap 100 snem kaba tang shi sngi, ha ryngkat ka phuh ka phieng ha ka 4 tarik September 2023 ha ka ïing Dorbar ha Mawkhar, Shillong.
Ha kawei pat ka liang ka Shillong Records Collection Centre (SRCC) ka la pynmih bad sam ïa ka kot lyngkdop kaba kyrteng, Ka Khasi National Dorbar-Ka Dap Shi Spah Snem 1923-2023”. Kane ka kot lyngkdop ka ïeng sakhi ïa ki kam kiba ka Khasi National Dorbar ka la leh ha ka spah snem ba la leit noh.
Da ka jingthmu ban pynkhreh ïa ka jaidbynriew Khasi ban im bad synshar hapdeng ki jingkylla ki ban sa wan bad ban pynkhreh lypa na ka bynta ban synshar hi da lade ïa lade, la saiñdur ïa ka Khasi National Dorbar ha ki jingïalang kiba nyngkong kiba la long naduh 4 haduh 6 tarik September 1923, ha ka kamra long jingïalang ha ïing u Rev J.J.M Nichols-Roy ha Goalapaty, Shillong.
Ban sngewthuh ïa ka jinglong jingman ka synshar khadar ha katei ka spah snem, ka long ruh kaba kongsan ban khmih ïa ki jingïaleh laituid kiba khih ha kylleng ka Ri Indïa ha katei ka por. Ha ka snem 1918, ka kut ka thma bah ba nyngkong, phewse ka Sorkar Phareng ka ai pynban da ka aiñ Government of Indïa Act 1919 ha ka jaka ba kan ai ïa ka jinglaitluid bad ka Riti Synshar. Kumta la khih puk ka jingïaleh laitluid kylleng ka Ri Indïa bad ka jingïaleh ka la nang wan dur bad khlaiñ bor. La sdang ruh ïa ka jingïakhih non-cooperation movement bad ki nong India kim treh ïatreilang shuh ne kyrshan ïa ka Sorkar Bilat. Da ka jingsngewthuh bad jingïohi lypa ïa kiei ki ban sa jia ha ka jylli synshar, ki katto katne ngut ki rangbah, kum U Kmuiñ Manik, Syiem ka Hima Mylliem, Bidor Singh, Syiem ka Hima Nongkhlaw, Rev J.J.M Nichols-Roy, Babu Wilson Reade bad kiwei ki la phah ïa ka notis, tarik 27-7-23 sha baroh ki Syiem, Myntri, nongsynshar bad ki riewpaidbah ban ïalum bad wan sha ka Dorbar ka ban long ha Shillong ha ki tarik 4 haduh 6 September 1923. Lyngkot ka notis ka thoh kumne, “Phi tip mynta ha kane ka ri Indïa ka jingkhih bad jingïaleh kaba jur ba ki nong India hi kin ioh synshar ïa la ka ri. Naduh ka snem 1921 ka jingsynshar ïa kane ka ri India…da ka Sorkar Bilat ka la sdang ban kylla…Lehse hapdeng shiphew snem naduh mynta kin bun shibun eh ki nong-India ki ban shim ïa ka jaka ki Phareng…te ka dei eh ïa ngi ban ïa kyndit bynriew ban pyrkhat ïa la ka ri ha ka jingïadei bad kata ka jingsynshar thymmai…Ngim dei shuh ban samthiah. Lada ngim khih kloi mynta ngin babe hadien ka bym lah ong shuh…”
Ha ka bui kaba nyngkong jong ka Khasi National Dorbar, Tarik 4-6 September 1923, la thoh ïa ki kyrteng jong ki 54 ngut ki rangbah bad kiwei de ki riewpaidbah kiba wan sha ka jingïalang kumba 300 ngut. Kine ki kynthup ïa ki Syiem bad Myntri jong ki Hima Khasi bad ki riewpaidbah. Napdeng kitei ki spah ngut, ka paw ruh ka kyrteng jong ar ngut ki Pastor ka Balang Khristan bad kita ki long, Rev J.J.M Nichols-Roy bad Rev Mon Lyngdoh na Laitumkhrah. ñiuma, ka Khasi National Dorbar ka dei ka jingïalang ban ïakren-ïatai ïa ki kam hima-sima, pynban kine ki ar ngut ki Pastor ki dei ki briew kiba proh bad ka rynïeng rynïot jong ki ka long kaba khraw bad ka imlang sahlang ruh ka ñiewkor ïa ki. Kine ki Pastor ki ïoh sngew ruh ïa ka jingud jingnam jong ki paidbah kiba lynga bad pisa jingmut. Ha ka sngi nyngkong jong ka Dorbar la jied ïa u Join Manik, Syiem ka Hima Sohra ban long kum u Chairman bad ïa u Hajom Kissor Singh kum u Secretary. Hadien kata la plie ïa ka jingïatai bad ki dkhot ki la ïashim bynta shit rhem ban ïatai ïa ki mat ki jura bad ki la buh jingtyrwa halor ki aiñ kiba la wanrah ha ka Dorbar.
Hapdeng ka snem 1924 bad 1928 lai tylli aiñ bad kita ki long; (i) ka Aiñ Long Khun Hima Ha Ki Hima Khasi, (ii) Ka Aiñ Bri Khyndew Ha Ki Hima Khasi bad (iii) ka Aiñ Hiar bad ïoh Pateng, la wanrah bad ïatai sani ha ka Dorbar haduh saw snem lynter tat haduh ban da mynjur bad pynlong aiñ da ka Dorbar. Ha ka Dorbar kaba la long ha ki 1 bad 2 tarik October 1925, ka Khasi National Dorbar ka la ïatai bad pynbeit halor ki ar tylli ki mat kiba kongsan, kawei ka long halor ka jingkylli uei ne kaei ki Khasi? bad kaba ar ka jingïashim bynta jong ki kynthei ha ka synshar khadar. Ka Dorbar ka la mynjur ïa ka jingtyrwa ba ki kynthei kin long ki dkhot ba pura jong ka Khasi National Dorbar.
Na ki dulir ba lah ban lum bad hadien ba la pule bniah ïa ki ki kam jong ka Khasi National Dorbar lah ban pynshai shynna ba baroh ar ngut ki Pastor, kata u Rev Mon Lyngdoh bad Rev J.J.M Nichols Roy ki la long kiba kongsan bad ki la noh synñiang shi katdei da ka jingtip bad jingshemphang ba jylliew jong ki shaphang ka history bad dei riti jong ka Jaidbynriew. Nalor nangta, ka jingngeit tynrai jong ki ha ka hok ka shi kyntien bad ka jingïalong mar ryngkat ka la tbeh jingshai ïa ka Ri baroh kawei.
Kine baroh ar ngut ki Pastor ki dei kiba suh thied ha u thning jong ka jinghikai Methodism jong ka Balang Khristan Methodist Presbyterian, kham hadien pat ki la mih na ka Balang Presbyterian bad seng la ka jong ka Balang trai ri. U Rev J.J.M Nichols Roy u la ïarap ban seng ïa ka Balang U Blei ne Balang Trumpet ha ka snem 1902, katba u Rev Mon Lyngdoh u la seng ïa ka Balang Trai Ri U Khrist ha ka snem 1924.
Na ki jingthoh lah ban ong ba shuwa ka snem 1887 u Rev Mon Lyngdoh u la shong shnong ha Lum Mawrie ha Laitumkhrah bad katkum i Bah D.L Warjri, “u Babu Mon Lyngdoh u khun jong u Rïang Bareh bad u poikha bad ka Shamai Mawrie. U long u rangbah uba ïar ka pyrkhat pyrdaiñ bad uba sbun…U long u Pastor bad ka jingim jong u ha ka jingïadei bad ki para briew ka long katkum ka jingngeit jong u.”
La ordain Pastor ïa u Babu Mon Lyngdoh da ka Balang Welsh Calvinistic Methodist Presbyterian ha ka Assembly kaba long ha Shangpung ha ka snem 1913. Ka jingtip kaba jylliew kaba u don halor ka riti, ka dustur bad ka histori jong ka Jaidbynriew ka paw ha ki ar tylli ki article kiba u la thoh bad pynmih ha ka Kot Khubor U Nongïalam Khristan ha ka snem 1912 bad 1915. Ki kyrteng jong ki article ki long, (i) Ka rukom kheiñ jait ki Khasi bad Synteng bad (ii) Ka dustur ioh bynta ki kur bad ki khun na ka kamai u kpa ha ri Khasi bad Synteng. Ka jingtip bad jingshemphang jong u Babu Mon Lyngdoh halor ka kheiñ kur, ka hiar bad ïoh pateng, ka jingïalong mar ryngkat bad ka bynta ki kynthei ha ka synshar hima ka phalang ha ka article kaba nyngkong. Katba ha ka article kaba ar, u Babu Mon Lyngdoh u kren shaphang ka kheiñ kha, ka burom kha, ka ïoh bad ka hïar pateng na ka liang u kpa. Katkum u babu Mon Lyngdoh, ka jinghikai Khristan ban ieid, ban burom ïa ka kmie bad u kpa ka snoh bah ha ka saiñ pyrkhat tip kur tip kha jong ki Khasi.
Ha kawei pat ka liang, U Rev J.J.M Nichols Roy u dei uwei na ki hynriew ngut ki khun jong u Khah Than Roy bad Ka Rimai Syiemlieh. La kha ïa u ha ka shnong Mawsiarwait ha Shella ha ka snem 1884 bad hadien u la long u riewdkhot jong ka Balang Presbyterian ha Shella ha ka snem 1899. Hadien ba u la pyndep ïa ka primary school la phah ïa u sha Shillong ban pyndep ïa ka high school ha Shillong Government School. Nangta u la leit bak sha Calcutta ban bteng shuh shuh ïa ka jingpule bad dei ha Nongbah Calcutta ba la tynruh ïa ka jabieng bad saiñdur thymmai ïa pyrkhat-pyrdaiñ ba luilui jong u bad u la pynïar bad pynkhraw shuh shuh ïa ka jingtip bad jingshemphang.
U Rev J.J.M Nichosl Roy u la sdang ïa ka jingïaid lynti ha ka saiñ hima naduh ka por ba u la shah jied kum u nongmihkhmat sha ka Legislative Council jong ka Assam Province ha ka snem 1920 bad u la long ruh u nongsaiñdur ïa ka Sixth Schedule bad ïa ka Dorbar District Council hapoh ka United Khasi & Jaiñtia Hills District ha ka snem 1952.
Ha ka Dorbar kaba la long naduh 11 haduh 13 tarik August 1924, u Rev J.J.M Nichols-Roy u kren shaphang ka jingma ba ki Hima Khasi kiba rit ki lah ban shah nguid ha ki heh paid Hindu bad Musulman bad u ong kumne, “ Lada ngin ong ai ba kin duh noh ki hima Khasi bad ngin ïa ngam lang bad ki para nong India, ngi sngew sheptieng, namar ki rukom laitluid jong ngi…ki rukom jingpyrkhat jong ngi ki ïa pher na kiwei ki para nong India…ka long ka bym lah ïa u Khasi ban ngam lang bad kiwei ki nong India”. U la kynthoh ruh ïa ka jingduna bad jingtlot ki Hima Khasi bad u kylli, “Ngi peit sha la ki Hima Khasi pat. Hato ngi i don jingshngaiñ? Em kata ruh em! Haei ngin shngaiñ? Ka don ka jingbymsngewthuh ka jingbympyrkhat ïa ka jingïap jingim ka jong ka ri Khasi. Ha ka jingbishar ngi iohi ka jingduna. Ha ka jingnang jingtip ngi iohi ka jingduna.”
U Rev J.J.M Nichols Roy u la kren khlem sheptieng ban pynpaw ïa ki jingangnud jong ki riewlum bad khamtam eh ki Khasi bad ruh u pynpaw ïa ka jinglong ba kordor jong ka jaidbynriew Khasi ka bym don ka jingpynïapher jait lymne ka jingkheiñ poh jait bad khraw jait ïano ïano ruh, hynrei baroh ki ïalong mar ryngkat. Katba ha ki jaka thor bad kiwei ki jaitbynriew ri thor kim don ïa kane ka jinglong.
Haba pynkut, ki Khasi ki don la ki jong ki khana ba kordor ha ka history jong ka Ri India. Ka Jaidbynriew ka angnud ïa ka jinglaitluid ba pura khnang ba ki nongshong shnong shynrang, kynthei bad kiwei kin ïoh ban ïashim bynta pura ha ka saiñhima bad ki kam bapher. Kumta ïa ka Khasi National Dorbar ruh lah ban khmih na kane ka phang.
