Nongstoiñ, Jylliew 14: Ka Deputy Commissioner, Eastern West Khasi Hills District ka la pyntip paidbah ba ka Ministry of Women and Child Development jong ka sorkar India, ka khot ban thep kyrteng na ka bynta ka Pradhan Mantri Rashtriya Bal Puraskar (PMRBP) Award 2026.
Kane ka dei ka award ba la pynkhreh da ka sorkar India na ka bynta ki khynnah kiba hapoh ka 18 snem ka karta tad haduh ka 31 tarik Naitung 2026, ban ithuh kyrpang ïa ki halor ki kam shlur ba ki la leh, ki kam ba ki trei ha kaba ïadei bad ka imlang sahlang, ki kam kiba ïadei bad ka mariang, ki kam ïalehkai sport, Art & Culture bad ruh ha ka Science & Technology.
Namarkata, la khot ïa ki kmie ki kpa, ki nonghikai skul, ki nongpynïaid skul, ki seng trei mon sngewbha, ki rangbah shnong bad ki nongshong shnong jong ka district, kiba don jingtip bad ithuh ïa ki khynnah kiba leh ïa ki kam shlur bad kiwei ki jait kam kumba la kdew, kiba I dei hok ban long ki nongïoh bynta ïa kane ka award, ki lah ban phah ïa ki kyrteng sha ka ophis jong ka Deputy Commissioner, Eastern West Khasi Hills District ha lane shwa ka 30 Jylliew 2026.
