Da ka jingialehkai basketball pynkut ka ophis u DSO Ri-Bhoi ïa ka jingrakhe kyrpang ki longkmie ha Nongpoh

Nongpoh, Lber 20 : Kum shibynta ka jingrakhe ïaka sngi kyrpang jong ki longkmie kaba la tip kum ka International Women’s Day ïaka la ju rakhe ha ka 8 tarik Lber ha shityllup ka pyrthei, ka ophis u District Sport Officer Ri-Bhoi District ha ka jingïatrei ryngkat lang bad ka Ri-Bhoi District Basketball Association ka la ïoh ban rakhe kyrpang ïa katei ka sngi bad la ïoh ban pynkut noh ïaka jingrakhe daka jingïalehkai Basketball jong ki kynthei kaba la sdang naduh ka 15 tarik Lber bad pynkut pat haka sngi Saitjaiñ. Ha katei ka jingpynkut noh ïa katei ka jinglehkai Basketball kaba dei shibynta jong ka jingrakhe ïaka sngi ki longkmie ka jingïakhun phainal hapdeng ka kynhun jong ki thei ïalehkai na Nongpoh pyrshah ïaka kynhun jong ki thei ïalehkai ka Hustles ‘B’ kaba naka shnong Marngar.
Ha kane ka jing ïakhun phainal, ka Nongpoh ka la lah ban pynliem noh ïaka Hustles ‘B’ da 52 baskets la 21 basket. Ka kynhun ki kynthei na Nongpoh kaba la long ka nongjop kala ïoh ban rah ïaka song pisa kaba T.10 hajar ryngkat ka trophy bad ka Hustles kaba wan ba ar ka la ïoh ban rah ïaka song pisa kaba T.7 hajar ryngkat ka trophy.
Kum ban shu kdew hangne, ka ophis u DSO Nongpoh ka la dep ruh ban pynlong ïaka jingïalehkai tan tyllai kaba dei ruh kum shibynta ban rakhe ïa ka sngi kyrpang jong ki longkmie ïakaba la dep ban pynlong haka 13 tarik Lber ha madan Pahamsyiem bad ki la ïoh ruh ban sam daka song pisa sha ki nongjop bala wan ban shim bynta da ki longkmie na kylleng ki jaka.Ha kane ka sngi pynkut ïa kane ka jingïalehkai basketball la wan ban ïadon bynta lang da u Vibhor Agarwal IAS, Director of Sports & Youth Affairs, u Bah Bobby L Nongbet DSO Ri-Bhoi, u Bah Sylvestar Mynsong Secretary ka RBDBA, Bah Mark William Nongrum Asst. Secretary ka RBDBA, ki dkhot ka Dorbar Shnong Nongpoh kiba kynthup ïa u Bah Michael Kharhunai, Samla Anthony Suchiang General Secretary, ki nongtrei naka ophis u DSO bad kiwei kiwei ki riew rangbah.