Nongstoiñ, Lber 20: Ka jaka rep kba ba heh tam ha ka Jylla ka don ha Madan Umyiap West Khasi Hills, namar ka dei ka pyntha rep kba kaba jrong bad ba heh tam. Katei ka pyntha rep ka dei kaba sei soh bha bad kaba long ka pliang ja jong palat phew tylli ki shnong kiba don ha ka thain West Khasi Hills.
Natduh jong katei ka pyntha rep kba, ki don ar tylli ki wahduid bad kita ki long ka Phodspung bad ka wah Jeidohkroh, kiba ïakynduh lang bad pynlong ïa katei ka wah ba kan tuid namar pdeng jong katei ka pyntha bad ïakynduh pat bad ka wah Umnamlang ha shuwa ban ïakynduh bad ka wah Kynshi.
Watla katei ka pyntha rep ka long kaba jrong bad kaba ïar, hynrei ki paidbah nongrep ki donkam shibun ki jingïarap na ka sorkar kum ka jingpynbha ïa ki nur um khnang ba baroh ki jaka rep, kin ïoh ïa ka um kaba biang. Ha ka jingjurip jong u nongthoh khubor, la lap ba ki don ki nur um na baroh ar liang katei ka pyntha rep, hynrei imat la shna ïa ki naduh laiphew ne sawphew snem mynshuwa, namar ki jaka ba la shna da ka dewbilat ki sah satang ka shynrong, ka um pat ka la ngam noh shapoh khyndew.
Ha katei ka pyntha rep la lap ruh ba ki nongrep ki trei shitom haduh katta katta ym tang ha kaba thung ïa u kba, hynrei naduh u riew hadem, ki jhur ki jhep u phan bad bun kiwei kiwei ki jait jingthung.
Ka kong A.Wahlang kawei na ki nongrep na ka shnong Mawthawir ka la ïathuh ba hadien ba la dep ot ïa u kba, ki sdang ban puh biang ïa ka lyngkha ban thung ïa ki jhur kum u kajor, motor, sohlakum, bit, kubi, tyrso bad bun jait ki jhur ha kaba ki lyngkha kba jong ki, ki jyrngam sah baroh saw aïom.
Katei ka longkmie ka la ong ruh ba ki don shibun ki jingeh ha ka kam rep. Ka daw ka long namar ka jingduna um ban pyntuid sha ki jaka rep ha ka por ba ki jhur ki dang sdang ban khie lung. Ka la ong ruh ba lada ka nur um kaba la shna naduh ka dam ba la tei da ka Irrigation Department ha wah Jeidohkroh ka dei kaba bha, ka um kam duna namar ba haduh katei ka nur um ka ïaid lyngba na rud kate jaka rep jong ki.
Kumta, kaei kaba donkam ka long ïa ka tnad kaba peit ia ka rep ka riang ba kan phai khmat sha kane ka pyntha rep kba, namar ka dei ka pliang ja jong kiba bun bah ki longïing bad lehse lyngba ki lad jingïarap na ka sorkar, kan kyntiew shuh shuh ïa ka kam rep bad ïa ka ïoh ka kot jong ki.
