Nongstoiñ, Lber 20: Ka Rev S.Wollington Memorial Secondary School Mawthengkut kaba la seng ha u snem 1998 kan sa rakhe ïa ka Jubilli Rupa jong ka jingdap ar phew san snem ha ka 30 tarik mynta u bnai ha ka skul kaba don ha ka shnong Mawthengkut.
Ha u kyrwoh ba la pyllait mynta ka sngi da u Rev A.Wanniang President jong ka skul, la ong ba na ka liang ka Managing Committee ka khot sngewbha bad wer ïa baroh ki nonghikai kiba la ïadon bynta ha katei ka skul naduh ba sdang bad ki bym don shuh hapoh ka skul.
Kumjuh ruh ka khot ka wer ïa baroh ki khynnah skul barim kiba la wan pule ha katei ka skul ba kin ïa wan baroh, khnang ban pynshit pynshngaiñ bad ba katei ka jingrakhe kan long kaba ishongkun.
Kum ban pynkynmaw ba u (L) Rev S.Wollington u dei na ka shnong Parïong bad u dei ruh u Pastor u ba nyngkong tam u ba la wan ban shakri ban tbeh ïa ka sharak jingshai sha ka thaiñ Nongstoiñ bad ha ka Ri Lyngngam hi baroh kawei. Dei lyngba jong utei u Pastor ba ka Balang Khristan ka la ïoh ban suhthied bad ban kharoi ha ka ri Lyngngam baroh kawei bad kaba la nang roi ruh haduh kine ki sngi.
