Nongstoiñ, Lber 20: Ka Bharat Sanchar Nigam Limited ka dei ka Kompeni telephone kaba la sdang nyngkong eh ban ai ka jingshakri ïa ki paitbah, da kaba pynïeng ïa ki tower ha man la ki jaka. Hynrei ha kine ki sngi uwei u tower u ba katei ka Kompeni ka la pynïeng ha ka shnong Sangriang, um shym la treikam shuh la shi bnai kynthih.
U bah Overshiland Sangriang sordar jong ka shnong Sangriang haba pyntip ha u nongthoh khubor mynta ka sngi, u la ong ba ka jingbym treikam shuh jong utei u tower, ka la pynduh nong haduh katta katta ïa ki paitbah kiba pyndon kam mobile phone da katei ka Kompeni. La ong ba ka la ktah ïa ki paitbah jong palat arphew wei tylli ki shnong kiba pyndonkam mobile phone kiba treikam lyngba utei u tower.
U bah Sangriang u la ong ruh ba ka jingduh jong ki paitbah, ka long namar ba ha katei ka thaiñ kiwei kiwei ki Kompeni Mobile kim pat da trei kam bha. Kumta ki paitbah ki hap ban pyndonkam da ka BSNL bad haba ki don ki kam ba kyrkieh kum haba don kiba shitom jur, kiba hap ban pyntip sha ki kali 108. Hynrei namar ym don network kumta ki hap ban shim wai da ki kali shimet ban pynpoi ha ki jaka sumar bad lada dei ba ka jingshitom ka la jur palat lei lei ka shem jingeh bha.
U la ong ba ki paitbah jong katei ka thaiñ ryngkat ki paitbah shnong Sangriang, ki la dawa ba lada utei u tower u la sniew ruh, ka BSNL ka dei ban wan maramot noh kloi. Lada kim wan ban maramot ruh ka BSNL ka dei ban pynthikna la kan dang pyntreikam ne kam pyntreikam shuh, khnang ba ki paitbah kin tip bad kin leh ïa kaba donkam.
