Nongstoiñ, Lber 20: Kum shi bynta ban shakri ïa ki paidbah jong ka thaiñ Mawshynrut, ki samla kiba na katei thaiñ ki la mih madan ban ieng ïada na ka bynta ka bha ka miat jong ka dong ka thaiñ ka Ri bad ka Jaidbynriew u Hynñiewtrep, ha kaba ki la seng ïa ka seng thymmai kaba la tip kum ka Hynñiewtrep Achik Youth Front kaba long Headquarter ruh ha Mawshynrut West Khasi Hills District.
Ïa ki dkhot jong katei ka seng la pynskhem hynne ka sngi da u bah B.Langrin president barim ka seng FKJGP Mawshynrut pyllun bad ki nongkitkam ki kynthup ïa u Banrap Kharpor kum u President, Sevenstar Synshiang kum u working president, Kornelius Diengngan bad u Don Hashah kum ki vice president, u Kening Lyngdoh kum u general secretary, u Tobia Nongmin kum u nongbat tyngka bad kiwei kiwei ki dkhot kiba la don kumba 50 ngut ei ei.
Ha katei ka jingïalang la ïoh ruh ïa ka jingkren na u bah Skhemborlin Hoojon president ka NPYF Mawshynrut block, u bah Franklin Dkhar bad la pynïaid ïa katei ka jingïalang da u bah Shanbor Syiem ha ka jingïalang ba la pynlong ha Don Bosco Hall Riangdo.
U bah Skhemborlin Hoojon president ka NPYF Mawshynrut block haba ai jingkren, u la ong ka long kaba jwat ïa ki samla ban trei kam sengbhalang. Hynrei ka dei pat ïa ki samla ban ieng skhem hapdeng ki jingeh bad ki jingïaleh kiba bun, namar ban trei sengbhalang hap ban long kum ki dieng shaiñ doh.
Katba na ka liang jong u bah B.Langrin president barim ka seng FKJGP Mawshynrut pyllun, u la ong ba ki sengbhalang kim dei ban shu kut tang ban ïashrut bad ka sorkar. Hynrei ka lah dei ka por ban leit ai jinghikai ïa ki briew jong ka thaiñ ba kin sngewthuh ban ym dei ban shu bam ei.
U la ong ba la ïohi ba ki briew ki bun ki bym pat sngewthuh ïa ka jingai jong ka sorkar, ha kaba ki bam ei ïa ki scheme, ïa ka bill light kim ju siew bad kumta ter ter. Ka jingleh mon ka dei namar ka jingbym pat sngewthuh, hynrei mynta suki pa suki ka la sdang ban kyrtoh kylla lyngba ki jingeh, haba wat ban dih um na ki dukan sha ym nud shuh, namar ka um ka la long kaba jaboh bad la hap ban thied da ka pisa.
