Da ka jingïalang kaba heh ban kyntiew ïa ka ïoh ka kot ki nongrep ha nongkyndong thmu ka CAU

Shillong, Nailur 07: Ka Central Agriculture University (CAU), Imphal kan pynlong ïa ka jingïalang kaba heh ha Umïam Ri Bhoi District lai sngi lynter ban ïakren halor ka rep tynrai ban kyntiew ïa ka ïoh ka kot sha ki nongkyndong.
U Prof, Dwipendra Thakuria, u nonghikai ha ka college ban pule ïa ka rep ka riang kaba don ha Umïam Ri Bhoi District la ong ba ïa ka jingïalang yn plie ha ka 9 tarik mynta u bnai 2026 bad kan kut ha ka 11 tarik 2026, bad ka mat jingïakren ka long “Natural Farming, Pathways to Self-Reliant Farming and Rural Prosperity”.
Ka jingpynlong ïa kane ka jingïalang ka long ban ïakren ïa ka rep tynrai khamtam eh ha kane ka thaiñ shatei lam mihngi jong ka Ri India, ka jingthmu ka long ba ki nongrep ki dei ban kham ïohnong na kane ka rep tynrai bad ha kane ka jingïalang kin ïakren ïa ki hynriew tylli ki phang ba ïadei bad ka rep tynrai.
Ha kane ka jingïalang kaba lai sngi ki don 461 ngut ki ban wan ïa shim bynta na ki ar phew wei tylli ki jylla jong ka Ri India, ki don 51 tylli ki jaka pule ha ka rep kin wan ïashim bynta bad 96 ngut ki nongrep kiba la pynneh pynsah ïa ka rep tynrai.
Ha kane ka jingïalang kin ïakren sani ha kaba ïadei bad ki polisi kiba ïadei bad ka rep tynrai kyrpang ha ka thaiñ shatei lammihngi ka Ri India bad ïa ka jingmih na kane ka jingïakren kin sa ai sha ki sorkar jylla ba kin shna ïa ki polisi ba ïadei bad ka rep tynrai.
Ha kane ka jingïakynduh bad ki lad pathai khubor u Professor u la ïathuh ba na ka liang ka skulbah ka la angnud na ka por sha ka por ban kyntiew ïa ka bha ka miat bad ka ïoh ka kot jong ki nongrep khamtam ha ki thaiñ nongkyndong ba kin kiew ha ka liang ka rep ka riang bad ba kin thung ïa ki jingthung katkum kane ka juk stad kaba mynta bad kiwei kiwei pat ki jingdonkam kiba ïahap bha ha kane ka por kaba mynta.