Pynwai ka ïingbishar HC ïa ka mukotduma Sou Motu halor ka jingpynïaid parade ïa u Nongïasaid Aiñ

Shillong, Nailur 7 : Ka Iing Bishar High Court ka la pynwai noh ïa ka mukotduma Sou Motu halor ka jingshah shoh bad shah pynïaid parade u Nongïasaid Ain ha Shillong, hadien ba pdiang ïa ki sienjam bala shim da ki Pulit bad ka Bar Council.Ka division bench ka Chief Justice Revati Mohite Dere bad Justice W Diengdoh ka la pynmih ïa kane ka hukum ha ka 1 tarik Nailur.
ïa kane ka mudui la shim kum ka suo motu halor ka jingmudui da ka jingthoh ha ka 29 tarik Naitung da ka High Court of Meghalaya Bar Association bad ka Shillong Bar Association, kaba kynnoh ba uwei u Nongïasaid Aiñ ula shah tan napoh ka chamber ha Keating Road da ka kynhun sengbhalang, shoh bad shah pynïaid parade sha Sadar Police Station, katba ki Pulit ki shu long tang ki nongpeitkai.
Ka Bar Association kala kyrpad ban pyntreikam ïa ka hukum ka Supreme Court ha ka mukotduma Tehseen S Poonwanlla, kaba buh ïa ki kyndon ban khanglad ïa ki jingleh donbor da ki kynhun ki bym dei ki bor Sorkar.
U Advocate General A Kumar ula pyntip ba ïa ka ejahar lah dep ban register pyrshah ïa ki briew kiba donkti bad ka jingtohkit kala ïaid shakhmat.
Ula kular ïa ka ïing Bishar ba yn pyntyllun ïa ka kam shaduh kaba kut bad ka Jylla kan bud ïa ki kyndon bala buh ha ka mukotduma Poonwalla.
Ka Iing Bishar kala bishar ruh ïa ka affidavit bala mudui da ka High Court Bar Association bad ka Bar Council of Meghalaya.
Ka Bar Council ka la pyntip ba kala dep buh ïa ki drop box ha ki Ophis jong ka bad sdang pyntreikam ïa ka portal ban ujor online kiba ïadei bad ki jingshah jrong kti kynshleiñ ki Nongïasaid Aiñ kynthei bad ki intern, kumba la bthah ha ka jingïalang ba long ha ka 31 tarik Naitung.
Halor ka jingkynnoh jrong kti kynshleiñ u Nongïasaid Aiñ la pyntip ïa ka ïing Bishar ba ka Shillong Bar Association kala sospon ïa u bad ka la pynlong ïa ka jingtohkit da ka Bar Council of Meghalaya.