Nongpoh, Risaw 10: Namar ka jingdonkam pisa ban tei ïaka Auditorium jong ka skul nakabynta ka jingdonkam jong ki khynnah ban pynlong ïaki prokram bapher bapher, ki bor pynïaid skul jong ka Mynken Christian Higher Secondary School, Bhoirymbong mynta ka sngi kila pynlong da ka ïew ïadie ïathied bala tip kum ka Food Fest cum Sales of work ha phyllaw jong katei ka skul, lyngba ki tiar ki tar, ki jingbam jingdih bala shet bad pynkhreh hi da ki khynnah skul bad ki nonghikai bad kumjuh ruh ki jain ki nep bala ai sngewbha da ki riew shimet.
Ïa katei ka Iew la wan ban plie ha ka por mynstep da u Swapnill Tembe, Director ka School Education & Literacy jong ka sorkar jylla haka jingdonlang u Principal ka Mynken Christian Hr. Sec. School, Bhoirymbong u bah Everlasting Pyngrope, ki dkhot jong ka School Managing Committee, ki nonghikai lem bad ki khynnah Skul.
Ha kane ka sngi Naka liang u Director jong ka tnad pule puthi u la ai sngewbha ruh daki juti ïalehkai football bad ki jersey sha ki khynnah ïalehkai Subroto Cup jong ka Mynken kaba long ruh kum ka dak ka jing ai khublei bad ka jingkitbok kitwriang ïa kitei ki rang ïalehkai ha shwa ba ki leit ban ïakhun ïaka Indo-French Football Tournament ka ban sa long ha France.
Kum ban shu kdew hangne ka skul Mynken Christian HSS ka dei kawei naki skul kaba la paw haka them Ri-Bhoi nalor ka shlem ban ai jingnang jingstad ka dei ruh ka skul kaba ju pynmih ïaki rang bad thei ïalehkai sports bapher bapher bad dang shen u Principal jong katei ka skul u la iohpdiang ruh ïaka khusnam National Teachers Award 2024.
Hynrei hapdeng ki jingïaid lynti katei ka skul ka dang don hapdeng shibun ki jingduna khamtam ka jingdonkam ban ioh noh ïaka Auditorium Hall ban pynsuk ïaki bor pynïaid skul bad kumjuh ruh ki khynnah pule ban lait naka sngi u slap haba pynlong ïaki prokram bapher bapher, bad kum ki bor pynïaid skul mynta sdang ban ïaid shakhmat ban tei ïakatei ka auditorium kaba ngiam kumba 500 ngut ki khynnah pule.
