Nongpoh, Naitung, 19: Kum ka jingthrang ban ban ïoh ïa kata ka jaka kyntang ba kan long kum ka jaka mane blei bad kiwei kiwei ki kam ba kynja mynsiem, ka Catholic Management Committee (CMC) jong ka Block – C, ba hap ha ka dong Mersohbhala jong ka Umsning Parish, ki la rai ban pynlong da ka Freedom Fest, kaba dei kawei ka tamasa ban rakhe laitluid bad ruh shi bynta ban pynmih pisa na ka bynta ban shna ïa ka ïingmane.
Kane ka Freedom Fest kan sa long ha ka 15 tarik u Nailar 2024 ha CFC Hall, ka Umsning Parish. Ki nongrwai ba pawnam jong ka jylla kin sa wan ban rwai ne pynphuh pynphieng ha katei ka sngi, naduh ka por 2 baje noh phai sngi..
Ka Kong Reeta Dahunlin Sunn, kaba dei kawei na ka dkhot jong ka CMC Block – C, ka la ïathuh ba ka jingangnud ban pynlong ïa kane ka Freedom Fest, ka dei shi bynta ba kin pynmih pisa, kaba dei ka jingangnud jong ka Dong Mersohbhala na ka bynta ban shna ïingmane, kaba la dei ka jingangnud kaba la slem bha bad kum ki para bangeit ki la kwah ban don la ka jong ka jaka kyntang ban ïa mane Blei.
Ka Kong Reeta Dahunlin Sunn, ka la ong ruh ba nalor ka jingangnud ban shna ïa ka ïingmane, ki don ruh kata ka jingangnud ban don kiwei ki centre ban ai jinghikai ba kyrpang na ka bynta ki samla, ki long kmie – longkpa bad ruh ïa ki khynnah rit bay m dei tang ha ka bynta jong ka jingngeit ne mane Blei, hynrei ban don kata ka jaka ai jinghikai kaba kyrpang na ka bynta ka shongkha shongman, ban kiar na ki jingmlien ba sniew kum u drok, ban kyntiew ïa ka pule puthi, ban ai jinghikai halor ka seng kam seng jam bad bansumar sukher ïa ka mei mariang bad ki wei ki wei kiba ai jingmyntoi ïa ki para bangeit.
Shuh shuh, kane ka Longkmie lyngba ka CMC Block – C, ka khot ka wer ïa ki paralok parajor bad ki paid riewngeit bad kynthup ruh ki paidbah ba kin wan ban shim bynta na ka bynta ban ai kata ka jingkyrshan halor kane ka jingangnud ban shan ïingmane bad ki kyrmen skhem ruh ba da ka jingkyrshan lang kin lah ban pynurlong ban shna ïa kata ka ïingmane ban shakri Blei.
