Da ka final basketball rakhe St. Gabriel’s Day ka St. Gabriel HSS Upper Shillong

Shillong, Nailur 29: Ka St. Gabriel’s Higher Secondary School, Upper Shillong, ka la rakhe ïa ka St. Gabriel’s Day ha ka 29 tarik u Nailur 2026, kaba dei ka sngi burom jong u St. Gabriel the Archangel, uba long u Nongda jong ka skul.
Kum shi bynta jong kane ka jingrakhe, ka skul ka la pynlong ïa ka final jong ka Inter-School Basketball Tournament, ha kaba saw tylli ki skul na kane ka thaiñ ki la ïashim bynta.
Ka jingïakhun ha ka final jong ki samla kynthei bad shynrang ka long kaba shongshit bha namar ki long kiba khlain baroh arliang.
Ka final jong ki kynthei ka long hapdeng ka Gorkha Higher Secondary School bad ka St. Gabriel’s Higher Secondary School, katba ka final jong ki shynrang ka long hapdeng ka St. Gabriel’s Higher Secondary School bad ka St. Xavier’s Minor Seminary.
Kine ki ar tylli ki jingïalehkai ki la long kiba itynnad bad ïakhun tyngeh haduh kaba kut. Ka St. Gabriel’s Higher Secondary School ka la ïoh ïa ka nam lahduh ha baroh ar tylli ki bynta, kata ha ka liang ki kynthei bad kumjuh ha ki shynrang.
Kine ki jingjop ki la wanrah ïa ka jingkmen kaba khraw bad ka la pynphuh shuh shuh sha ka jingrakhe ïa ka St. Gabriel’s Day.
Ha kane ka sngi, la donlang ruh u Bah Hamletson Dohling, Adviser jong u Myntri Rangbah ka Jylla kum u Kongsan katba ka Kong Faricia Majaw, kaba la shongthait kum ka Assistant Lecturer, ka la long ka Symbud Kongsan.
La don lang ruh u Fr. Tobias K. Ngapkynta, Secretary; ka Sr. Modesta, Principal bad kumjuh u Bah John Jarain, Vice-Principal; ki dkhot jong ka School Managing Committee, ki nonghikai bad ki khynnah skul.
Ka jingrakhe ka la pyni ïa ki jingdonkam jong ka jingïatreilang, ka jinglong ryntih bad ka mynsiem ïalehkai bad khamtam eh ka jingiaineh, nalor ba ka la wallam lang ïa baroh ki skul na ka thain ban ïa shim bynta ha ki jingïakob ha ka rukom kaba shongshit, kaba khuid bad kaba wanrah shuh shuh ïa ka jingïadei kaba jan.