Mawkyrwat, ‘Naitung 26: Ka ophis jong ka District Mental Health Programme (DMHP), South West Khasi Hills District kaba hap hapoh ka jingpynïaid jong ka ophis treikam jong u District Medical and Health Officer (DM&HO), South West Khasi Hills District ka la pynlong ïa ka street play lane ka drama lyngkot halor ka koit ka khiah jong ka jingmut jingpyrkhat bad jong ki khynnah samla kiba 10 haduh 19 snem kyrta hapoh Ïew Mawkyrwat, South West Khasi Hills District.
Ka jingthmu jong kane ka drama ka long ban pynshai paidbah halor ka koit ka khiah ka ba ïa dei bad ka jingmut jingpyrkhat bad ki jingpang kiba ïa dei bad kajingmut jingpyrkhat khamtam ïa ki khynnah samla ki ba dang hap ha ka Adolescence Age Group kata 10 – 19 snem.
Ha kane ka sngi ïa ka Street Play ne ka Drama la shimbynta da ka PHL Group napoh Shnong Mawten, South West Khasi Hills District kaba ki la ai kyrteng “Phikir” bad ha kane la pyni ha ki paidbah ïa ki daw kiba pynlong ïa u briew ba un ïoh ïa ka jingpang ha ka jingmut jingpyrkhat. Shuh shuh ki la ban bniah halor kumno ki kmie ki kpa ba ki dei ban sngewthuh ïa la ki khun ki kti khamtam ha ka por ba ki dang khynnah bad ka jingbym ïa sngewthuh jingmut jong ka kmie bad u kpa ka lah ban wanrah jingsniew ïa ki khun ki kti. Kumta, kum ki kmie ki kpa ki dei ban shimkhia ïa ka koit ka khiah ha ka jingmut jingpyrkhat.
Ban pynshai shuh shuh ïa ka jingmut jong kane ka prokram ki la don ruh ki nongkren kiba kynthup ïa ka kong Alcydalyne Lyngkhei, Clinical Psychologist bad kong Wanteidamon Lyngkhei, Adolescence Counsellor ryngkat ka jingïadonlang ruh ka kong B. Snaitang, Psychiatric Nurse, kong E. Syiemiong, Case Registry Assistant, kong D. Marweiñ, Ward Assistant.
Ha ka jingkren jong ka kong A. Lyngkhei kaba la kren halor jingkordor jong ka koit ka khiah ha ka jingmut jing pyrkhat bad kiei kita ki jingpang kiba ki lah ban ïoh ha ka jingmut jingpyrkhat jong ngi ki briew. Ka la pynshai ruh halor ka jingbun jong ki briew kiba ïoh ïa kane ka jingpang, hynrei bun na ki kim tip ïa ki dak ki shin bad ka pynlong ïa ki ruh ba kin nym shimkhia ban sumar ïa lade ha kaba ïa dei bad ka jingmut jingpyrkhat. Ka la pynshai ruh ba ka District Mental Health Program (DMHP) ka long kawei ka tnad treikam kaba peit halor ka koit ka khiah ha ka jingmut jingpyrkhat.
Katbaka ha ka jingkren jong ka kong W. Lyngkhei, Adolescence Counsellor ka la pynshai halor ka ‘Adolescence Health Clinic’ kaba don ha Civil Hospital, Mawkyrwat, South West Khasi Hills District bad katto katne ki kam kiba ïa dei bad kane ka clinic. “Kane ka clinic ka dei na ka bynta ban ai jingïasyllok ïa ki khynnah samla kiba 10 haduh 19 snem ka rta”, ïathuh ka kong W. Lyngkhei.
La pynïaid ïa ka program da ka kong Nydia Marbaniang, Monitoring and EvaluationOfficer bad kumjuh ruh kaba la ai jingruh ki kyntien khublei.
