Nongpoh, Lber 03: Ban phai khmat kyrpang ka sorkar na ka bynta ban leh janai ïa ka madan Kurkalang ha Bhoirymbong ba kan long kawei na ka madan ïalehkai sport kaba la bit la biang, u MLA ka Umroi, u Bah Damanbait Lamare u la phah syndon da ka jingtoh sha u Myntri rangbah ka jylla, u Conrad K. Sangma ba un shim khia na ka bynta ban pynbit pynbiang ïa katei ka madan kum kawei na ka madan ïalehkai kaba la bit la biang ban kyntiew ïa ki kam ïalehkai sport ki samla hapoh ka jylla.
Kumba la pynpaw ha katei ka dorkhas, u MLA ka Umroi u Bah Damanbait Lamare, u la pynpaw ba u don shisha ka jingangnud ka sorkar jylla kan phai khmat noh sha katei ka madan, kaba la donkam shisha ban pynbit pynbiang bad khamtam ban thaw noh ki lad ki lynti ban shna syndon da ka stadium kaba bit ba biang khnang ba ka jingdon katei ka madan kaba la biang pura kan ïarap ban kyntiew ïa ki khun samla kiba don sap ha ki jingïalehkai sport bapher bapher.
Ha kawei ka bynta, u la pynpaw ruh ba katei ka madan ïalehkai ha Kurkalang la donkam ban siang noh da u phlang plastik (artificial turf) bad ruh ban pynbiang ïa ki jaka ïeng kali bad kiwei kiwei ki jingdonkam kiba ïa dei dur bad ka kam ban kyntiew ïa ki kam ïalehkai sport/
Shuh shuh, na ka liang u MLA ka Umroi, u Bah Damanbait Lamare, u la pynpaw ruh ka jingkmen ba u Myntri rangbah ka jylla, u Conrad K. Sangma u la kular ban shim khia bad ban pynurlong ïa katei ka jingangnjud jong u kum u nongmihkhmat paidbah na Umroi, khnang ba lada ka sorkar ka lah shisha ban leh janai ïa katei ka madan kan long shisha ka jingkyrkhu ïa ka dong Ri Bhoi bad wat ïa ka jylla hi baroh kawei khamtam na ka bynta ki samla kiba don sap ha ki kam ïalehkai sport, u la bynrap.
