Ym lah ban leit ka jingdon bad jingïoh shisha ïa ki surok ba bha bad ba bïang ki long ki lad ban kyntiew sted ïa ka roi ka par bad ka khaii pateng namar ki surok ki long da shisha u Budlum jong ka ïoh ka kot bad ka roi ka par jong ki paidbah.
Ka jyla Meghalaya jongngi naduh ba la dep ka surok Shillong By-pass bad ka Surok 4-lane ka la wan rah shisha ïa ka jingmyntoi ïa ki paidbah ha baroh ki lïang, namar ka long ruh ka jingsarong ïa ki paidbah ba ki la ïoh ban ïaid ha ka surok kaba la bit la bïang haba ïa ujor bad ki por ba la leit noh. Nalor kata ka jingïoh ïa ka surok Mawlai By-Pass nangta ka jingbha ka surok kum na Shillong sha Nongstoin shaduh Garo Hills, ka surok Shillong Jowai bad kiwei kiwei kiba dang shna mynta kum ka Shillong-Dawki, Shillong -Sohra khlem pep ka la rah ïa ka nam ka burom ka jylla namar ka sorkar ka pyrshang katba lah ban ïai pynbha ïa ki surok ha kylleng ka jylla.
Haba phai dien sha ka Mynnor, ka jingeh ki paidbah ha ka jylla ka dei ka jingdheng ki kali paidbah ha ka surok bah NH40 kaba la teng teng ka shim por da ki phew kynta ba ki paidbah ki sahkut ha ki surok bad teng teng ki paidbah ki ïapthngan bad khamtam kiba pang ba shitom kiba thmu ban leit sumar ki khlad noh tang ha shiteng lynti. Ka jingkylli ka mih pat hangne. Hato, ka jingwan rah ka sorkar ïa ka Surok 4-lane bad ka Shillong By-pass kam dei moh ka jingmyntoi ïa ki paidbah ka jylla?.
Haba pyrkhat bha la dei ruh ban ai burom ïa ka sorkar jylla bad kumjuh ïa ka sorkar pdeng kiba la wan rah ïa kine ki surok sha kane ka jylla ban pynsuk ïa ki paidbah ha ka leit ka wan bad khamtam ka jingïoh ïa ki surok kiba la bïang pura ïa ki paidbah ka dei shisha ka lad kaba lah ban kyntiew ïa ka roi ka par jong ki paidbah.
Ka don ruh ka por ba ki paidbah ha ki por ba la leit noh ka la mih tang ka jingkhnium bad ka jingud ha ka leit ka wan ba ka jingrit jong ka surok bah NH40 ka la wan rah ruh ïa ka jingdheng ki kali namar ka jingbun ki kali ki motor ka la pynkhapngïah ïa ka surok. Hynrei ha kane ka por ba mynta mano ba poi pyrkhat ba ki paidbah ki la suk ha ka leit ka wan bad hato ki la klet mo ïa ka jingjynjar ha ka leit ka wan ha ki por ba la leit noh.
Ha kine ki sngi pat naduh ba la pyndep ïa ka surok 4-lane bad ba la pyndep ïa ka surok Shillong By-pass ngim juh ïohi shuh ba kin don kata ka jingdheng kali ha ki surok bad kum ki paidbah ka jylla ki la dei ban sngewnguh ïa ka sorkar jylla bad ym tang ban shu tip ban kynnoh ne kynshi haba don kino kino ki jingduna ha ka lïang ka sorkar.
Ka jingwan ka surok 4-lane bad ka Surok Shillong By-pass ki paidbah ki la dei ban ai ïa ka jingïaroh kaba khraw ïa ka sorkar kmie bad kumjuh ruh ïa ka sorkar jylla, namar dei lyngba ka jingshim khïa jong ka sorkar kmie bad sorkar jylla la lah ban wan rah ïa kine ki surok kiba la ai jingmyntoi shisha ïa ki paidbah ha ka leit ka wan namar ka jingbha ka surok ka la pynsuk naduh ki nongleit nongwan, kiba pang ba shitom bad ki samla pule kiba ïaid lyngba jong kitei ki surok.
Ki paidbah ki la dei ruh ban phai dien ïa ka mynnor bad ka mynta. Ha ki p or ba la leit noh lada phai ha ka lïang ka surok ka long shisha ka jingkynduh mawsïang ïa ki paidbah ha ka leit ka wan bad ka jingshim khïa ka sorkar kmie bad ryngkat ka sorkar jylla kan ba dang mih ki por bad ki sngi ka dang wan ka jingkylla kaba la long ka jingmyntoi ïa ki paidbah jong ka jylla.
Ka jingwan rah ïa ka surok bah na Nongstoin ha Tura, ka surok na Mairang sha Ranibari, ka surok Jowai By pass bad ki don ruh kiwei kiwei ki surok ba ka sorkar ka dang thmu ban pyntrei mynta. Lada kine ki surok kin dep noh kan long ka jingmyntoi ïa ki paidbah ka jylla ha baroh ki laing.
Ka la dei ka por ïa ki paidbah ba kin ieng ban ïa tylli ban ïa trei lang bad ka sorkar na ka bynta ban wanrah ïa shibun ki kam pynroi ba ki paidbah ki dang donkam ha ka jylla bad kum ki paidbah ki dei ruh ban sngewthuh ym tang ban khnium ne wohdong, hynrei ban wan shakhmat ban ïa trei ryngkat bad ka sorkar na ka bynta banwan ka roi ka par ha baroh ki lïang.
Hooid, ka sorkar jylla ka la pyrshang ban wan rah ïa shibun ki surok ba ki paidbah ki donkam ha ka jylla bad kaba la long ruh ka jingkyrkhu ïa ki paidbah, hynrei kumba long haduh mynta ki dang don shibun ki thain kiba dang duna ha ka lïang ka surok ba kum ka sorkar ka hap ban phai khmat ban kham shim khïa kyrpang ïa ka surok.
Ban wan ka roi ka par la donkam ban don ka jingïatylli kum ki nongshong shnong ka jylla, namar haba don ka jingïatylli bad ka jingïasngewthuh jingmut, lah ban wan rah ïa shibun ki kam pynroi ba ka imlang ka sahlang ha ka jylla ka donkam.
Namarkata, kumba ka sorkar ka la shim khïa ban wan rah ïa shibun ki kam pynroi ba ki paidbah ki donkam khamtam ka surok, ka la dei ka por ruh ba ka sorkar kan dang kham shim khïa ïa ki surok sha ki nongkyndong bad ki thain khappud, namar kumba long haduh mynta bun na ki shnong nongkyndong bad ki shnong haki thaiin khappud ka jylla, ki dang sahdien shisha ha ka lïang ka surok bad lad lada ki paidbah kim ïoh ïa ka surok kaba bit bïang ka long ruh kaba eh ban kyntiew ïa ka roi ka par bad ka ïoh ka kot jong ki paidbah ha ka jylla.
