Shillong, Lber 7 : Namar ka jingsngewkhia halor ka jingrem palat ka bai klass ba la oh da ki college ha Jylla, ka Sorkar ka la rai ban thaw noh da ka Committee ka ban shong bishar ïa ka bai klass bala shim da ki college bapher bapher kiba ïoh jingïarap na ka Sorkar ne ki Govt Aided College. Kane kan long ruh wat ia ki skul ruh kumjuh, ong u myntri ka tnad pule puthi ka jylla u Rakam A Sangma.
“Kane ka Committee kan shong ban bishar bha thik ba thik ïa ka jingïapher ka jingshim bai klas jong ki jaka pule bapher bapher” ong u Myntri ka Tnad Pule Puthi Rakkam A Sangma haba ïakren bad ki nongthoh khubor mynta ka sngi Palei.
“Ki lah ban don ki jingdonkam jong ki College-ïa ka jingtei building, ban pyntyllun ïa ki kam, ka song pisa sha ki kam pynroi-lada ka jingpynlut ka dei kaba shong nongrim kan bha palat hynrei lada palat, nga tharai na ka bynta ka bha ka miat ki kynnah,ka Sorkar kan hap wad ïa ka lynti ban shim rai ïa ka kam” ula ong.
Ula ong ba ka don ka jingïapher bak ly bak hapdeng ka jingoh bai klas da ki college ka Sorkar lem bad ki college ba ïoh jingïarap na ka Sorkar hapoh ka Jylla.
U Myntri ula ai nuksa sha ka degree course (Bachelor of Arts), ka Kiang Nongbah Goct College, Jowai ka don 98 ki santion post da ka Sorkar bad kane ka college kala shim bai klass tang T. 7460 na ka bynta ka jingpule ba lai snem katba ka St. Anthony’s College, Shillong, ka ba don haduh 101 ki sanction post da ka Sorkar, ka la shim haduh T. 69,020. Kumjuh ruh, ka Tura Govt College kaba don 86 ki sanction post da ka Sorkar, kala shim T. 15,260 na ka bynta ka jingpule degree ba lai snem ha ba ïanujor bad ka St. Mary’s College, Shillong kaba shim haduh T. 84,780 ïa kajuh ka course watla ka don 65 ki sanction post da ka Sorkar.
Ka St. Edmunds’ College, Shillong ka don 70 tylli ki sanction post da ka Sorkar hynrei ka la shim haduh T. 95,720 na ka bynta ka jingpule degree ba lai snem. ïa ka BA Media Technology , ka St. Anthony’s College kala shim haduh T. 1,90,120.
“Kala iapher bun shah ha ka jingshim bai klass da kine ki college, ïa kiba la ai jingïarap da ka Sorkar….Nga sngew ba ngi dei ban ïakren ïa ka dor bai klas bad shim rai” ula ong haba bynrap “Haba kut jong ka sngi, kam dei satia tang ka kam bai klas hynrei ka dei ruh ka jinglong janai. Ki lah ban don katto katne ki samla pule kiba stad kiba kwah ban rung klass ha kine ki jaka pule kiba paw hynrei tang namar ka jingrem ka bai klass, kim shym la ïohlad shuh”.
Nalor kane, u Myntri ula ban jur ba ki jaka pule kim dei ban kdat noh sharud ïa ka jingthmu ba hakhmat jong ki “naba ka jingdon ki jaka pule ka long ban ai jinghikai, ka long ban saiñdur ïa ka longbriew manbriew kaba bha”.
“Nga sngew ba hateng hateng ngi klet balei ba ngi ieng hangne mynta. Nga kyrpad ia baroh ki college, ngi dei ban kynmaw ia ka thong balei ngi don hangne, ngi don hangne mynta ban shakri ia ki para briew” ula bynrap.
