New Delhi, Lber, 7: Ka President jong ka ri India ka Droupadi Murmu ha ka sngi Balang ka la pynkup burom da ka khusnam Sangeet Natak Akademi (Akademi Puraskar) na ka bynta u snem 2022 bad 2023 sha ki 91 ngut ki riewpawkhmat kiba la paw pyrthei bha ha ka liang ka lariti ha ka jingïalang pynkup burom kaba la long ha Vigyan Bhawan, New Delhi.
Na kane ka jylla Meghalaya, i Kong Helen Giri i la ïoh pdiang ïa ka khusnam Sangeet Natak Akademi na ka bynta u snem 2023 halor u synñiang u bynbei ba i la noh sha u sup u thiar jong ka put ka tem tynrai ha Meghalaya.
La kha ïa i Kong Helen Giri ha ka 7tarik Rymphang, 1944, bad i dei ka longkmie kaba la trei shitom khlem shongthait ban kyntiew bad ban pynneh pynsah ïa ka shad Khasi. Kum kawei na ki nongrwai bapawkhmat jong ka All India Radio, Shillong, i Kong Helen Giri i la trei shitom ruh ban pynpawnam ïa ki tiar tem tiar put u Khasi ha ka rynsan jong ka ri. Kum ka nongrwai ha kylleng ki bynta ka ri India bad shabar ka ri India, i Kong Helen Giri i la ïoh bha ïa ka jingithuh na kylleng.
I Kong Helen Giri ym tang ba i ju ïashim bynta ha kiba bun ki prokram bad ki tamasa, hynrei i ju pynlong ruh ïa ki tamasa ban pynpawnam ïa ki jingrwai bad ki jingshad tynrai ha Meghalaya. Lyngba kane ka jingtrei shitom, i la pynkhie im ïa ka lariti bad ka kolshor, khamtam ha kaba ïadei bad ka riti ka dustur Khasi. Shuh shuh, i la shimkhia ban ithuh ïa ki Master Craftsmen kiba ju shna ïa ki tiar tem tiar put Khasi. Kane ka jingthrang jong i, ym tang kaba pynneh pynsah ïa ka jingtrei bani jong ki nongshna tiar tem hynrei ka long ruh kum ka lad aikam ïa ki briew kiba ju shna ïa kine ki tiar.
I Kong Helen Giri i dei iba la ïoh pdiang ïa ka khusnam Padma Shri halor ka jingnoh synñiang sha ka lariti bad ka kolshor jong ka Meghalaya ha u snem 2008.
Ha ka jingsam ïa kane ka khusnam la sakhi lang da u Myntri uba khmih ïa ka tnat Culture, Tourism bad DoNER u G. Kishan Reddy, u Myntri Khynnah ka tnat Law & Justice (Independent Charge) bad Parliamentary Affairs and Culture u Arjun Ram Meghwal, u Secretary ka Ministry of Culture u Govind Mohan, u Chairman jong ka Sangeet Natak Akademi u Dr. Sandhya Purecha bad kiwei kiwei.
