Shillong, Lber, 7: U Myntri Rangbah ka Jylla u Conrad K. Sangma ha ka sngi Palei u la pyllait paidbah ïa ka “Climate Adaptive Community Based Water Harvesting Project” ha ka jingïalang kaba la long ha State Convention Centre, Shillong ha ryngkat ka jingsakhi lang jong ka Myntri ka Koit ka Khiah ka Dr. Mazel Ampareen Lyngdoh bad u Myntri ka tnat Soil and Water Conservation u Marcuise N. Marak
Kane ka projek kaba T. 21 crore ka long ban shna ïa ki 532 tylli ki jaka pynlang um ha ka jingheh kaba 350 hecrate ka jaka, 2500 hectare kiwei pat ki jaka bad 12500 hectare ki tyllong um.
Ka jingpyntreikam ïa kane ka projek kan pynthikna ïa ka jingpahuh jong ka um ha ki shnong ki thaw bad kumjuh ruh ban sam um sha ki lyngkha ki risai. Kan pynmyntoi ïa ki 72,000 hajar ngut ki nongshong shnong, kynthup ruh ki tyllong um.
Haba pynpaw ba ka jingkynshew um jong ka jylla Meghalaya ka dei kaba la ai jingïaroh da ka Ministry of Jal Shakti, ka Sorkar India, u Myntri Rangbah u la ong, “ka Meghalaya ka dei kaba nyngkong eh ka jylla ha ka ri ban pyntreikam ha kiba bun rukom ban kynshew ïa ka um. Ka tnat PHE, ka tnat Water Resource bad ka tnat Soil and Water Conservation ki ïatreilang na ka bynta kiba bun ki projek, bad lada kheiñ kyllum lang kan kot kumba T. 8000 klur.”
U la ong ba ki don bun tylli ki projek kiba la pyntreikam mynta bad kin dang don shuh shuh sa kiwei pat ki projek ki ban dang wan kiba thmu ban ïada, ban pynneh pynsah ïa ka um bad ïa ki tyllong um.
U la ïathuh ba ha ka taïew ban sa wan yn sa buh mawnongrim na ka bynta ka projek sam um kaba heh ha New Shillong Township kaba kot T. 1600 klur.
“Ngi la wanrah ïa kane ka projek ha kata ka rukom ba ka Shillong, New Shillong, Administrative bad ka Knowledge City kin ïoh pahuh ïa ka um na ka bynta 30-40 snem,” u la ong.
Ka Phase-1 jong kane ka projek ka kynthup ïa ka jingshna ïa ki jaka pynlang um kaba kot T. 600 klur.
U la ong ruh ba ha kane ka jingïalang mynta ka sngi, la ithuh ïa ki 36 tylli shnong kiba lah ban shna ïa ki jaka pynlang ïa ka um kaba kot T.7 klur ha kaba ïa ka pisa la pyllait sha kine ki shnong ban pyntreikam noh ïa kane ka projek.
