Da ka CM Care+ yn kyrshan ka sorkar ïa kiba ïoh ïa ki jingshitom kiba jur bad bun ka jinglut

Shillong, Lber 19 : Ka sorkar jylla ka la pyntreikam mynta da ka skim CM Care+ ban kyrshan pisa ïa kito ki nongpang kiba shitom jur bad kiba donkam khambun ka jinglut ban ïoh ïa ka jingsumar kaba kham kyrkieh.
Ïa kane la pyntip da ka Myntri ka Koit ka Khiah, Dr. M Ampareen Lyngdoh haba kren bad ki lad pathai khubor ha nongbah Shillong.
Katkum ka jingïathuh jong ka Myntri, kumba 78 persen ki nongshong shnong ka jylla ki la pynrung kyrteng ïalade ha ka MHIS na ka bynta ban kyrshan ïa ka jinglut jingsep ha ka pang ka shitom. Hynrei lyngba ka MHIS la ong ba ki don bun ki jingshitom kiba kham jur bad kham bun jinglut kam lah than ban ïarap bad dei na kane ka daw ba ka sorkar ka la pyntreikam noh da ka CM Care+.
“Kane ka ‘CM Care +’ pat ka peit na ka bynta ban kyrshan ïa kito ki nongpang kiba kham jur bad kham bun ka jinglut. Mynta tang na ka MHIS lehse phin ym lah ban pyndap ban ai jingsumar kum ïa ka jingpang bampong, jingpang khyllai, pang klongsnam bad kiwei ki jingpang kiba donkam kham bun ka jinglut,” ka la ong.
Nalorkane, ka Myntri ka ïathuh ba dei halor kane ka nongrim ba ka sorkar ka la sdang da ka CM Care + bad lyngba kane ka skim ki nongshong shnong kin ïoh ïa ka jingkyrshan pisa kaba kham heh kaba kot palat 2lak tyngka kawei ka longiing. Shuh shuh ka ong ruh ba lyngba kane, ka jingpynlut hi na ka liang ki nongshong shnong kan kham duna.
“Na ka liang ka CM Care+ ngin peit kyrpang ruh na bynta ki longkmie bad ki khunlung kiba dang shu kha,” kala bynrap biang.
La ïathuh ruh ba ki tnad jong ka sorkar jylla kum ka tnad ka Koit ka Khiah bad ka tnad Social Welfare kan peit ruh na ka bynta ban pyntreikam ïa bun ki jingmyntoi kiba ïadei naka bynta ki 1000 sngi, ki sngi ba nyngkong jong i khunlung hapoh ka jingpeit jong ka kmie. Ka ong ruh ba kan wan sa ka tnad pule puthi ban peit bad tuklar lang na ka bynta ka jingheh jingsan jong i haduh ba in da dap 3snem ne lai snem shiteng ne 1000 sngi.
“Kane ka long ruh shi bynta ban ïarap ban pynduna ïa ka jingïap khlem dei por jong ki khunlung ba dang rit bad ruh ban ïoh ïa ki khunlung bad ki nongshong shnong kiba shait bad khlain bad kiba san ba plung,” ka la ong.
Na ka liang ka Myntri ka la pyntip ruh ba kane ka skim ka la treikam shaid shaid.
Kumta, ka la pyntip ruh ba ka sorkar kan peit ba kin ym bun ki kyndon kiba ïadei bad ka jingpynrung kyrteng na ka bynta ki nongpang kiba donkam ïa kane ka jingïarap ha ka por ba donkam kyrkieh.