Da ka burom pdiang ka jylla ïa ki rangïalehkai Karate ba khur takma na ka South Asian Karate Championship

Shillong, Naitung 21: Arngut ki nongïalehkai Karate na Meghalaya ba kynthup ïa u Daniel Dabiangbha Warjri bad Gideon Tympuin, kiba dang shu wanphai hadien ba ki la wanrah nam na ka 10th Cadet, Junior, U-21 and Senior South Asian Karate Championship 2026 ha Dhaka, Bangladesh, la pdiang burom da ka All Meghalaya Karate-Do Association (AMKA), ki bahaïing hasem bad ki paidbah ha Umroi Airport ha ka sngi Baar.
U Daniel u la khur ïa ka takma ksiar ha ka jingïakhun Boys’ Junior Individual Kumite (-68 kg), katba u Gideon u la ïoh ïa ka takma rnong ha ka jingïakhun Men’s U-21 Individual Kata. Ka lympung jingïalehkai ka la long naduh ka 15 haduh ka 19 tarik Naitung ha Dhaka.
Hadien ka jingjop jong ki, baroh arngut ki la pynpaw ba ka thong kaba bud jong ki ka long ban ïalehkai bha bad khur takma ha ka 39th National Games 2027, kaban long ha Meghalaya.
Haba poi ha Umroi Airport, la pdiang burom ïa ki da ki nongïalam ka AMKA, ki bahaïing bad ki paralok. La wan ban pdiang kyrpang ruh da ka MLA ka East Shillong bad Adviser ka Sorkar Meghalaya, Dr. M Ampareen Lyngdoh, ryngkat bad u MDC barim Fantin Lakadong. Na ka liang u Working President ka Meghalaya State Olympic Association (MSOA), John F. Kharshiing, u la wan lang ha kajuh ka liengsuin na Kolkata bad kine ki arngut ki nongïalehkai.
Kane ka dei ka sien kaba lai lynter ba ki nongïalehkai Karate na Meghalaya ki la wanrah takma na kane ka South Asian Championship. Ha u snem 2025, ka Kynjailin Lyngdoh Mawnai ka la khur takma rnong, katba ha u snem 2019, ka Wandahunshisha Mawblei ka la khur ïa ka takma ksiar.
Na ka liang u General Secretary ka AMKA, Bah Ksan Kupar Warjri, u la ong ba kane ka jingjop ka long ka jingïkmen kaba khraw ïa ka association bad kan long ruh ka mynsiem jingïakhun ïa kiwei pat ki nongïalehkai Karate kiba dang pynkhreh na ka bynta ka National Games.
“Ka jingïalehkai ha ka South Asian Championship ka long ka jingïakhun kaba jwat bha. Watla ka India ka dang bat ïa ka kyrdan ba hakhlieh, hynrei ki ri kum ka Pakistan, Sri Lanka bad Nepal ruh ki don ki nongïalehkai kiba khlaiñ bha. Ka jingjop jong kine ki arngut kan ai mynsiem ïa kiwei pat ki karateka jong ngi,” ong u Bah KsanWarjri.
Ïa u Gideon la jied ban mihkhmat ïa ka ri hadien ba u la khur takma ksiar ha ka 5th KIO Senior & U-21 National Karate Championship 2026 ha New Delhi, katba u Daniel u la ïoh takma rupa ha ka 5th KIO Sub-Junior, Cadet & Junior National Karate Championship 2026 kaba la long ha Dehradun.
Haba kren hadien ka jingïoh pdiang burom, u Daniel u la ai khublei ïa baroh kiba la wan ban pdiang ïa ki bad ong ba kane kan ai mynsiem ban trei shitom shuh shuh.
“Ka jingïakhun ha ka South Asian Championship ka kham pher ban ïa ka National Championship. Nga hap ban trei shitom bad pyndonkam ïa ki buit jingïalehkai kiba pher. Ka thong jong nga mynta ka long ban khur takma ksiar ha ka National Games ha Shillong bad hadien kata ban ïalehkai bha ha ka World Championship,” ong u Daniel.
U Gideon pat u la ong ba ka jingïakhun ha ka kata event ka long kaba eh namar ki nongïalehkai na kiwei ki ri ki long kiba tbit bha.
“Ka jingïakhun ka la long kaba eh shibun. Nga kwah ban dang ïoh mihkhmat shuh shuh ïa ka India bad ban wanrah nam ym tang ïa ka ri hynrei ïa ka Meghalaya ruh,” ong u Gideon.
Da kane ka jingjop, ka AMKA ka dang bteng ban pynskhem ïa ka nam kum ka association kaba lah ban pynmih ïa ki nongïalehkai kiba lah ban wanrah takma ym tang ha ka kyrdan ka ri hynrei wat ha ki lympung jingïalehkai ba kyrdan South Asia ruh.