Da ka aiñ yn ïakhun ka shnong Namdong bad ka Raid Namdong ïa ka jingpynbna ba pynmih ka JHADC

Jowai, Rymphang 02: Ka Dorbar Shnong Namdong ryngkat ka Raid Namdong kiba hap hapoh ka Elaka Nongjngi ki la pynrem jur ïa ka Executive Committee jong ka Jaiñtia Hills Autonomous District Council (JHADC) ba la ïalam da u Chief Executive Member (CEM) Bah Thombor Shiwat kaba la shim ïa ka rai ban pynbna biang ba ka Thadmynri ka hap sha u pud u sam jong ka Elaka Nartiang lyngba ka NO.JHADC/POL/33/2014/70, Dated, Jowai, The 23rd– January– 2025, khlem da bishar bniah ïa ki kot ki sla jong ka shnong Namdong ka Raid bad ka Elaka Nongjngi.
Ka shnong Namdong bad ka Raid Namdong ki la pyni ba ka Thadmynri ka dei ka jaka kaba hap pura hapoh u pud u sam ka Elaka Nongjngi katkum ki jingjia bad ki kam kiba la leh naduh ka por ba dang don ka United Khasi Jaiñtia Autonomous District Council tad haduh mynta ha ka Jaiñtia Hills Autonomous District Council, ba la paw shai baroh ki kam la leh bad long trai da ka Elaka Nongjngi ka Raid Namdong ryngkat bad ka jingïatreilang naduh ka shnong Namdong-A bad ka Thadmynri hadien ba la don ki briew ba shong shnong ha kane ka khlaw.
Ha kajuh ka por ka shnong Namdong ryngkat ka Raid Namdong bad ka Elajka Nongjngi ki la hap ban ujor sha ka Iingbishar Meghalaya Hight Court halor ka jingpynbna kyndit da ka Executive Committee jong ka JHADC ba ka Thadmynri ka hap shapoh u pud u sam ka ELaka Nartiang khlem ka jingïapynbeit kaba tikna na baroh arliang. Lyngba ka jingujor sha ka Iingbishar Meghalaya High Court, ka JHADC lyngba ka Secretary Executive Committee ka la pynbna ha ka 15 tarik, Nohprah, 2020 ba la pyndam noh ïa ka jingithuh ïa ka shnong Thadmynri na ka ELaka Nartiang kumba la pynbna ha ka 7 tarik, Risaw, 2020. Halor kane ka Iingbishar Meghalaya Hight Court ha ka 16 tarik, Nohprah 2020 ka la pynkut noh ïa kane ka jingpynbna bad ka la pyntikna ba ka shnong Thadmynri ka hap hapoh ka Eaka Nongjgni.
“Hynrei kaba pynlyngngoh pat ha kane ka kynti shwa ka elekshon sha ka JHADC, u CEM u la phah ïa ka jingpynbna ba ka shnong Thadmynri ka hap sha ka Elaka Nartiang lyngba ka Jingpynbna (Notification) kaba u la leh “back date” kumba u la kren ha ka Video kaba la ïoh ring da mano re mano ha ka Dorbar ba u la pynlor ha ka shnong Thadmynri ba u la pynbna biang naduh ka 23 tarik, Kyllalyngkot, 2025,” ong u kyrwoh ba la phah da u Secretary Shnong.
“Halor kane ka shnong Namdon bad ka Raid Namdon hapoh ka Elaka Nongjngi kim lah ban pdiang ïa kane bad ïa kane ka kam ladep ban ruh ïa ka ujor halor ka jingpynsngew paidbah kaba la pynlong ha JHADC ba kim lah ban pdiang namarba ki don ki kot ki sla ba shisha da ki “original” ban pynshisha ba ka Thadmynri ka hap hapoh ka Raid Namdong, Elaka Nongjngi ym kumba leh ka Elaka Nartiang bad ka shnong Thadmynri tang da ki “Xerox paper” ban pynbiej ïa ka Executive Committee ban leh ïa kane ka kam sang kam ma hapoh ka Raid Namdong bad ka Elaka Nongjngi khlem da bishar ïa ka jinglong trai ba shisha katkum ki kot ki sla ba shisha. Halor kane ngi kren shai ba ngin ïakhun ïa ka hok da ki bor jong ka aiñ ban pynïoh ïa ka hok jong ngi,” pynkut u kyrwoh na u Secretary Shnong.