Dei u CM ba ïalam nyngkong ïa ki nongïalam niam sha Delhi ban ïakynduh ïa ka sorkar pdeng halor ka FCRA

Shillong, Nailar 11 : Ka National People’s Party (NPP) ka la kyntait mar dor ïa ka jingkynnoh jong ka Meghalaya Pradesh Congress Committee (MPCC) ba ka NPP ka shu sngap jar jar halor ka Foreign Contribution (Regulation) Amendment Bill, 2026, namar ka Party ka khlem sngap jar jar ne shong kli kti hynrei dei ka NPP hapoh ka jingïalam jong u Myntri Rangbah ka jylla u Conrad K Sangma uba dei u National President ka NPP uba la ïalam nyngkong eh ïa ki Nongïalam Niam ban leit ïa kynduh ïa ki nongïalam ka sorkar pdeng ha Delhi halor ka FCRA.
Ka jingkynnoh ka dei ka bym don nongrim bad ka bym shisha bad kaba don jingthmu saiñ pyrthei kaba sniew ha lyndet. “ Ka record ka la pynshai kdar ba ka Sorkar Jylla ba ïalam da ka NPP, hapoh ka jingïalam u Myntri Rangbah Conrad K Sangma, ka la dep ïa kynduh ïa ka Sorkar Pdeng bad buh ruh hakhmat ïa ki jingsngewkhia ka Jylla halor ka FCRA Amendment Bill.
Kat kum ka kyrwoh na u nongaiktien ka NPP u Aldo A Sangma (MDC), ula ong ba u Myntri Rangbah Conrad K Sangma da lade ula ïalam ïa ka kynhun ki nongïalam niam sha New Delhi ban ïakynduh ia u Myntri kam Pohïing u Amit Shah bad ki la pynsngew ruh ïa ki jingsngewkhia ba ki don halor ka FCRA Amendment Bill hakhmat ka Sorkar Pdeng.
“Kane kam dei ka kam ba sngap jar. Kane ka dei ka jingleit ïakren markhmat ha ka kyrdan kaba halor eh jong ka Sorkar India” ong u Aldo.
“U Myntri Rangbah um shym la ai tang ki jingkren na Shillong. Ula ïalam ïa ki nongïalam niam bad ki nongmihkhmat na ki shnong bad pynbeit ruh ban ïakren markhmat bad u Myntri Kam Pohïing ka Ri. Ka kynhun ka la pynsngew ïa ki jingsngew khia ba ïadei bad ka jingtreikam ki Balang, ki jaka pule bad kiwei ki seng kiba shaniah ïa ka jingsynñiang pisa na shabar ri” ula bynrap.
Une u nongïalam ka NPP ula ong ba ki jingkynnoh ka congress namar kata ka pynmih ïa u dak jingkylli. Sa kaei pat ka Congress ka khmih lynti ïa ka Sorkar Jylla ban leh?.
Ka NPP ka ngeit ba ïa ka kam ba ïadei bad ka jingsngewkhia u paidbah halor ka FCRA kam dei ban shu pynlong kam saiñ pyrthei lane ka drama surok. Haba ka ishu ka lah ban ktah ïa ki balang, ki skul, ki hospital bad kiwei kiwei, ka jinglong nongïalam ba don jingkitkhlieh ka donkam ïa ka jingïakren, jingïapynbeit bad ka jingbud dien khlem kut.
“Namar kata ka NPP ka jied ban trei ïa ki ishu kiba dei hok shisha, ha ka jaka ban trei tang ban ïoh headline ha ki lad pathai khubor” ula ong haba bynrap “Ka long kaba sngewsih ba ka Congress ka la jied ban batai ïa ka jingleit ïakynduh ka Sorkar bad ki Nongialam Balang ha Delhi kum ka kam ba shu sngap jar jar”.
Ula ong ba ki paidbah ka Meghalaya ki lah ban bishar ïa ka jingïapher hapdeng ka synshar khadar ba don jingkitkhieh bad ka jingpynksan saiñ pyrthei.
“Ha ka jaka ban ïalam bakla ïa u paidbah da ki jingkynnoh ba sngap jar, ka Congress ka dei ban kubur ïa ka jingshisha bad ai synñiang lem ïa kaei kaba tei, ban ïakren halor ka FCRA Amendment Bill” ong u Aldo.