Shillong, Naiwieng 05: Ka Samkhamti hynnin ka sngi Saitjaiñ jong ka taïew ba ladep ka la ïoh ban pynhap pyrda noh ïa ka lympung lehkai phutbol jong kiba la rangbah kaba la tip da ka Samkhamti Veteran Cup ha kaba ïa ka namlahduh la rah da ka kynhun Meghalaya Police Football Veteran kaba la pynliem noh ïa ka Friends United ha ka final.
Ha kane sngi la ïadon ryngkatlang u Bah Madan Shangpliang- National Raferee ba la shongthait jong ka AIFF-India kum u kongsan ryngkat bad u Bah Hamebantei Diengdoh lem bad kiwei kiwei kiba la shah khot sngewbha.
Na ka liang jong u Bah Samborlang Diengdoh u la ai khublei ïa u Bah Madan Shangpliang u ba la wan sakhilang ha kane ka sngi pynkut bad ruh ïa baroh ar ki kynhun kiba la ïohrung sha ka final napdeng ki 16 kynhun kiba la wan ïashimbynta.
Haba ai jingkren ha kane ka sngi, u Bah Madan Shangpliang u la pynpaw ba ka jingïashimbynta jong ki ha kane ka lympung ym tang ba ka ïarap ïa ka phutbol hynrei ka ïarap ruh ban ïoh ïa ka met ka phat kaba koit kaba khiah. U la bynrap ha ka jingïaidlynti kum u nongïalehkai lane u referee kan ïaid katkum ka kyrdan na kawei sha kawei pat.
Kumban shu pynkynmaw, ïa kane ka la pynlong man ka sngi saitjaiñ kaba la sdang naduh ka 07 tarik Risaw bad la pynkut noh hynnin ka sngi Saitjaiñ, ka 4 tarik Naiwieng ha madan lehkai Urkaliar.
Haba phai sha ka jingïalehkai, ka kynhun jong ka MPFV ka la khur namjop salit da shi kol ba la thep da u Marshall Kurkalang.
Ha ka jingsam khusnam u Bah Michealsanroi Khongphan na ka MPFV u la ïohpdiang ïa ka khusnam ‘Oldest Player’, u Bah Pynskhem Garod na ka Sumer Veteran u la khur ïa ka khusnam ‘Top Scorer’, ïa ka nam rangïalehkai ba kynsaitam lane ‘Best Player’ la khur da u Bah Kitkupar Kharshiïing na ka MPFV, katba ïa ka khusnam rangapkol ba kynsai lane Best Goalkeeper la khur da u Bah Augustine Shangpru.
Ka Friends United watla ka la shahrem ha kane ka final jong kane ka lympung hynrei ka la leit phai ïing ryngkat ka song tyngka kaba 30,000 (lai phew hajar), katba ka MPFV ka la ïohrah ïa ka trophy ryngkat bad ka song tyngka kaba 50,000 (san-phew hajar).
