Anfield (Liverpool), Naiwieng 28: Ka Liverpool ka la long ka kynhun ba nyngkong ban pynthikna ïalade ban ïohrung sha ka wat ïakhun Round 16 (play-off) hadien ba pynliem noh ïa ka Real Madrid da 2-0 kol ha Anfield, kaba dei ruh ka namjop kaba san sien lynter ïa ka Liverpool ha ka Champions League mynta ka samoi.
Baroh arliang mamla ki la pynsyrwa kai ïa ki penalty ha ka jingïalehkai kaba la kut noh ha kaba ka Liverpool ka la pynneh ïa ka rekod ba paka jong ka ha ka wat ïakhun league phase, bad ka jingïaroh ka long ïa ka jingïatreilang jong ki player kiba la pynurlong ïa kitei ki kol.
U Alexis Mac Allister (52’ min) u la buh hakhmat ïa ka kynhun katto katne minit hadien ba la ïaid ka kylla miet lyngba ka bol ba la ïarap pashat da u Conor Bradley shuwa ba u Caoimhin Kelleher (rangapkol ka Liverpool) un ïada ïa ka penalty jong u Kylian Mbappé.
Hadien kane u Mohamed Salah u la pynsepei ïala ka jong ka penalty, hynrei watla kata ruh, ka Liverpool ka la ïoh ban pynkhih ïa ka kol kaba ar jong ka lyngba u Cody Gakpo (76’min), u ba la pyndei tiak da ka khlieh ïa ka bol pashat jong u Andy Robertson.
Ha kawei pat ka jingïalehkai, ka Borussia Dortmund ka la shim ïa ka sienjam kaba khraw ban ïohrung sha ka wat ïakhun Round -16 ha kaba kane ka kynhun kaba poi final ha u snem ba ladep ka la jop da 3-0 kol shabar nala ïing pyrshah ïa ka Dinamo Zagreb ban kyntiew 12 poiñ ïalade ha ka miej.
Ki kol na u Jamie Gittens (41’min) ha ka kylla step, bad ar tylli ha ka kylla miet – na u Ramy Bensebaini (56’min) bad na u Serhou Guirassy (90’min) ka la biang pura ïa ka Dortmund ban khur ïa ka jingjop kaba saw jong ka ha kane ka wat ïakhun league phase.
Ha kawei pat ka bynta, ka Aston Villa ka la pynneh pynsah ïa ka rekod ba skhem ha la ïing da kaba ïakhaid (0-0 kol) bad ka Juventus ha Villa Park.
