Shillong, Jylliew 24: Ka sienjam ba san (5th) jong ka jingïakop mareh thong kaba la tip da ka ‘Sohra International Half Marathon 2026’ kan long ha ka 04 tarik Nailur 2026, la pynbna ka Meghalaya State Olympic Association (MSOA) hynne ka sngi Balang.
Ïa kane ka jingïakop la pynlong da ka jingkyrshan jong ka Directorate of Sports & Youth Affairs, ha ka jingïatreilang bad ka Meghalaya State Olympic Association (MSOA) bad ka Meghalaya Athletics Association (MAA).
Kumban shu kdew ka sienjam kaba saw (4th) jong ka Sohra International Half Marathon ka la khring haduh 10,576 ngut ki nongmareh, kaba dei ka rekod ha ka jingbun ki nongïashim bynta, bad mynta u snem la khmihlynti ïa ka jingïashim bynta kaba kham bun kynthup ruh kiba na bar ri. Hynrei mynta ka kynti ka MSOA ka la rai ban pdiang ym palat ïa 11000 ngut.
Kane ka jingïakop mareh ka kynthup ïa ka 21 km, 10 km bad ka 5km Run for Fun.
Ha ka jingïalang bad ki lad pathai khubor, ka MSOA ba la mihkhmat da u Bah John F Kharshiïing-Working President, Bah Finely L Pariat-General Secretary bad bah Ksankupar Warjri-Treasurer, ha ka jingïadon lang u Director ka tnad Sports & Youth Affairs, u D.D Shira, ki la pyntip ba nalor ka jingithuh da ka World Athletics, ïa kane ka jingïakop yn registar ruh ha ka AIMS (Association of International Marathons and Distance Races).
Ka jingpynrung kyrteng (registration) kan plie naduh ka 01 tarik Naitung haduh 15 tarik Nailar lyngba ka website jong ka MSOA, bad yn nym pdiang ïa ki kyrteng ynda ka jingkheiñ ka la kynjoh ïa ka 11,000 ngut, la pyntip ki nongpynïaid.
Ha kaba ïadei bad ka jingpynrung kyrteng u Bah Ksankupar, u la pyntip ba ki nongaplai kidei ban da pyndap shai ïa ki kyrteng katkum ka kyrdan ba ki thmu ban shim bynta bad ka jingpynrung kyrteng kan thikna tang ynda ki ladep ban siew.
Kumba long ha ki sienjam ba ladep, kin don bun tylli ki kyrdan mareh, na ka bynta ki shynrang bad kynthei, ba kynthup ïa ka 21K Elite/Open (18 snem shajrong), 21k Meghalayan Open (18 snem shajrong), 10k Meghalayan Open (18 snem shajrong bad 40 snem shapoh), 10k Meghalayan Open (40 snem haduh 55 snem), 10K Meghalayan Open (55 snem shajrong).
Ka bai rung (baroh shynrang bad kynthei) na ka bynta ka 21k Elite ka long 2,000 tyngka, 1,000 na ka bynta ka 21k Meghalayan Open, 200 na ka bynta ka Meghalaya 10km bad 100 tyngka na ka bynta ka 5k Run for fun. Yn nym shim bai rung na ka bynta ki nong Sohra kiba shim bynta ha ka 5k Run For Fun.
Ka khusnam pisa ha ka 21k Elite la kyntiew sha ka Rs. 3 lak na ka bynta ki nongjop (shynrang bad kynthei), Rs.2 lak ïa kiba pyndep ha ka kyrdan ba ar bad Rs 1 lak ïa kiba wan kyrdan ba lai. Kan don ruh ka khusnam kyrpang lane Consolation prize kaba mar Rs 10,000 na ka bynta ki nongmareh kiba wan kyrdan ba saw haduh phra.
Katba ka khusnam pisa na ka bynta kiwei pat ki kyrdan ki sah kumjuh, ha kaba ki nongmareh ba wan ba nyngkong (shynrang bad kynthei) ha ka 21km Meghalayan Open kin ïohpdiang Rs 50,000, ba wan ba ar 30,000, bad ba lai 20,000. Kan don ruh ka Consolation prize kaba mar Rs 5,000 na ka bynta ki nongmareh kiba wan kyrdan ba saw haduh phra.
Ha ka 10km Meghalaya Open (18 haduh 40 snem), kiba wan ba nyngkong kin ïohpdiang Rs 30,000, ba-ar 20,000 bad balai 10,000, kynthup ruh ïa ka Consolation prize ba mar 5,000 tyngka ïa kiba wan ba saw haduh ba phra.
Ha ka 10km Meghalaya Open (40 bad 55 snem bad 55 snem shajrong) ka khusnam pisa ka long Rs 25,000 ïa kiba wan ba nyngkong (shynrang bad kynthei), 15,000 ïa kiba pyndep kyrdan ba ar, bad 10,000 ïa kiba wan kyrdan ba lai. Kan don ruh ka khusnam kaba mar 3000 tyngka na ka bynta kito ba pyndep ha ka kyrdan ba saw haduh ba phra.
Nalor kane kan don ruh ka khusnam ba kyrpang ïa ki 200 ngut ki nongïashim bynta kiba pyndep nyngkong ïa ka U-14 5K Run For Fun, kumjuh ruh ïa ki nongïashim bynta kiba la palat 50 snem kiba pyndep ïa ka 21km bad ïa kiba la palat 60 snem kiba pyndep ïa ka jingmareh ha ka 10 km.
