Shillong, Naiwieng 28: Ka Meghalaya ka la pynkhreh ha baroh ki liang ban pynlong ïa ka Me?Gong Festival 2024. Ha kane ka Tamasa kin don ki nongtem nongrwai napoh ka ri Sweden, ka Swedish Rock Band’Europe’, Gajendra Verma, Indus Creed, ka Indian rock band kaba na Mumbai, ka Euphoria, ka Indian Pop rock band, bad ka DJ kaba dei ruh ka actress Bollywood ka Uddita Goswami.
Ïa kane ka tamasa yn long ha Jenjal hapoh ka Baljek Airport, West Garo Hills, Tura. Hapoh ka phang ‘Echoes of Traditions’, la khmih lynti ba kin poi palat 3 lak ngut ki ban wan sngap bad ki nongwan jngohkai ha kane ka jaka.
Kane ka tamasa kaba arsngi kan sdang mynta ka sngi ka 29 tarik bad 30 tarik, 2024 ha kaba yn don lai tylli ki jingpyni kiba kongsan kiba kynthup ïa ka Cultural Performance bad Musical Showcase, ki jingïakob jingïalehkai tynrai (traditional games) bad sports bad handloom, handicraft, bad kiwei ki jingpyni nam. Ha kane ka tamasa yn pyni ïa ki kam kiba kongsan kiba ïadei bad ki riti dustur jong ki Garo lyngba kiba bun ki jaka.
Ïa ka Me’Gong festival la pynwandur ban khring ïa kiba bun ki nongsngap. Kane ka prokram ka ai ruh ka rynsan na ka bynta ki riew donsap jong ka thaiñ kaba kynthup ïa ka Da Suraka, ka rock band kaba dei na Garo Hills bad ka Summer Salt, kaba dei ka kynhun tem na Shillong.
Shuh shuh ha kane ka tamasa kan don ruh ka traditional fashion show ka ban pynshong nongrim halor ki riam tynrai bad ki jaiñ ba la thaiñ na kane ka thaiñ shatei lammihngi da kaba pynleit jingmut ïa ki riti dustur jong ki jaitbynriew Garo.
Ha ki tamasa ba la dep ki la khring palat 2.3 lak ngut kiba la wan sha kane ka tamasa ki ba la wan peit ruh ïa ki jingpyni jong ki kynhun tem bad rwai bapher bapher kum ka Venga Boys, Armaan Malik, Parikrama, bad kumjuh ruh ka MLTR (Michael Learns to Rock) ha u snem 2022.
Kane ka Me?Gong festival 2024 la ong ba kan donlang ïa ki jingrakhe ïa ki kolshor bapher bapher, kiba thmu ban pyni ïa ki jingriewspah ka riti dustur kiba la hiar pateng ha ki paid Garo.
Nalor kine baroh, ka Me?Gong 2024 kan long ka tamasa ka ban pynsah kynmaw naba ha kane ka prokram kin don ki riew don sap napoh ka ri bad kumjuh ruh kiba nabar ri ki ban pyni ïa la ki jong ki sap bad ki ban pynlynuh ha kine ki 2 sngi jong ka tamasa. Kan wanrah hapoh kawei ka rynsan ïa baroh ki kynhun jaitbynriew, ki nongwan jngohkai, ki artisan bad kiwei kiwei.
