New Delhi, Naiwieng, 28: U Dr. Vishwamitra Batra hadien ka jingpyndep ïa ka jing pule Graduation ha ki dawai u la leit ban shakri bad ai jingïarap ïa ki riewlum ka Ri India ha u snem 1983. U la ai ruh ka jingshakri kaba 41 snem. Ha kane ka jingïaid lynti u la jied ïa ka Meghalaya kum ka ïing jong u ha kaba u lah ban ai jingsumar ïa ki nongshong shnong hapoh ri Khasi,hynrei ym tangba u ïarap ha ki jingpang hynrei u ladei ruh uwei na kiba la lamkhmat ban rat dyngkhong ïa ki jingeh kaba ki paidbah ki ïakynduh ha ka imlang sahlang bad ban ai jinghikai bad jingstad ha ki skul ïa ki khynnah.
Kane ka dei ka khusnam ba nyngkong hapoh ka thaiñ Shatei Lammihngi ban ïoh pdiang da u Dr. Batra u briew ba nabar ka jylla ban ïoh jingithuh ïa ka jingshakri jong u ïa ki briew jong kane ka thaiñ.
Haba kren ha kane ka jingïalang, u Krishna Gopal u la pynsngew ba ka ladei ka por ban shimkhia ïa ki jingeh jong ka thaiñ Shatei Lammihngi baroh kawei namarba kawei pa kawei ka jylla kaba don hapoh ka thaiñ ka don ïa ka jingsngew kum ka Ri ïa ka jong ka jylla. Kane ka dei ka dawbah ba ka thaiñ Shatei Lammihngi kam ju shongsuk na ka jingkwah ban pynïakhlad bad ban ïoh ïa ka jinglaitluid ha la ka jong.
U la banjur ruh ba ka ladei ka por ban ym dei tang ban ithuh ïa kane ka thaiñ ka ladei ruh ban don ka jingïadei kaba jan. Ki kynhun trei mon sngewbha na ka kane ka thaiñ ki sngewthuh ïa ki jingeh ba ki riewlum ki ïakynduh bad ki la pyrshang ban wanrah shibun ki projek ban pynkiew ïa kane ka thaiñ khnang ba kan don ha ki ka jingsngewïajan bad ka jingïatylli.
U nongprat lynti ïa ka ‘My Home India’ uba dei ruh u nongïalam bahalor jong ka BJP u Sunil Deodhar u la ong ba ka khusnam Swami Vivekananda Smriti Karmayogi ka dei ïa ki briew ba la noh synniang ïa ka bha ka miat jong ka Ri na ka bynta ka thaiñ shatei Lammihngi. Ki jingkylla kiba ngi ïohi hapoh kane ka thaiñ ki dei ki jingshakri baradbah jong ki “Karmayogi.”
Ki don da ki spah ngut ki briew kum kine hapoh ka thaiñ Shatei Lammihngi, hynrei ka dei ka jingsarong ba u Dr. Batra u lah shah jied ban ïoh ïa kane ka jingithuh ïa ka jingshakri jong u ha ka koit ka khiah kane ka thaiñ kaba wanrah ruh ïa ka jingsngew ieid Ri.
Haba pdiang ïa kane ka khusnam, u Dr.Batra u la ong ba kane ka khusnam ka ïaid ryngkat sha baroh ki “karmayogi” kiba trei met bad mynsiem ban pynurlong ïa ki projek bapher bapher jong kane ka thaiñ wat hapdeng ki jingeh ba ki ïakynduh.
Ha kane ka jing pynkup burom la sakhi lang da ki kynrem ki lyndan ryngkat u Myntri ka Koit ka Khiah barim jong ka Sorkar Pdeng u Dr.Harsh Vardhan bad u Bah Robin Kurbah uba long u President jong ka Seng Khihlang bad kiwei kiwei.
