Kan ym don kano kano ka jingïapynbeit thymmai ha ka jingbate shuki Myntri: CM

Shillong, Naiwieng, 27: U Myntri Rangbah ka Jylla Conrad K Sangma ha ka sngi Balang u la kren da kaba shai ba kan ym don kano kano ka jingpynbeit thymmai namarba ka NPP kan ïai bteng ban ïatreilang bad ki paralok ha ka kynhun MDA na ka bynta ka jingskhem jong ka Sorkar.
Ha ka jingïakren bad ki lad pathai khubor, u Sangma u la ong, “ngi sngewkmen ba ka NPP mynta ka la don haduh 32 ngut ki MLA bad dei tang ka seng All Party Hill Leaders Conference (APHLC) kaba la kynjoh (mynshwa) ïa une u nombar. Ngi sngewnguh shikatdei eh bad ngi ai ai khublei ruh ïa u Blei bad ïa ki paidbah kiba la ai ïa ka jingshaniah ha ngi.”
“Ngi la shai bha naduh ka sngi kaba nyngkong kum ka party, kum ka kynhun synrop bad kum u Myntri Rangbah, ngi don hangne ban phah ïa ka khubor kaba bha sha ki paidbah ka jylla. Ha,oid ka sainpyrthei ka long kaba kyllaiñ jyrwit bha bad ki don ruh ki daw kiba wan ha ngi hynrei ha ki sngi ban sa wan nga kham pyrkhat ba ka khubor jong ka jingskhem bad ka khubor jong ka jingshaniah ki long kaba kongsan ha ka sain pyrthei bad wat hapdeng ka jingshisha ba ngi don ka jingbun paid, ngi ïaineh bad ki paralok jong ngi. Ngi la pyni ïa ka jingshaniah jong ngi ha ki, ki la pyni ïa ka jingshaniah jong ki ha ngi bad ngi kwah ban ïohi ba ngin trei ha ka por ban dang wan na ka bynta ka jingshngaiñ jong ka jylla bad ka jingroi ka ïoh ka kot baroh kawei. Namarkata, kam don ka daw ba kan don kano kano ka jingpynbeit thymmai ne kaei kaei kaba kum kata,” u la pynpaw.
“Ha,oid, ki lah ban don ki jingtynjuh hapoh ka kynhun synrop. Ki lah ban don ki jingïapher hapdeng ki seng saiñpyrthei, ngi lah ban ym ïa mynjur ha kiba bun kiei kiei kiba ngi kwah ban leh hynrei kata ka dei ka jinglong jong ka kynhun synrop bad ka sain pyrthei hynrei ha kaba kut kaei kaba ngi ïa mynjur lang ka long ba ngi dei ban ïatreilang da ka jingaiti kaba pura na ka bynta ka roi ka par baroh kawei jong ka jylla bad kata ka dei kaba don hapdeng kaei kaba ngi pyrshang ban leh kum ka kynhun synrop nga kwah ban leh. Sa shisien nga ïaiban ba ka jingkyrshan ba pura jong ngi bad kumjuh ruh ka jingshaniah ba pura jong ngi, ka jingkylli jong ka jingpynbeit thymmai kam don bad baroh ki paralok ki don ryngkat bad ngi bad ngin dang ïai bteng ban ïatreilang,”u la bynrap.
Shuh shuh, u Sangma u la ong ba baroh ki MLA jong ka NPP ki sngewkmen shibun ïa ka risol bad kam don kano kano ka jingpynbor ïa u ban pynrung kham bun ki Myntri na ka party.
“Ki MLA jong ngi ki la pyni ïa ka jingshaniah ha ka Sorkar bad ym don uwei ruh na ki uba la ju kdew ïa kane ha ngi hynrei hooid kin kwah ban ïohi ba ki Myntri kin don shuh shuh hynrei ngi hap ban buh ha ka jingmut ïa ka dur kaba kham heh bad ka politik kaba kham heh kam dei tang shaphang ka thain rilum Garo, rilum Khasi ne rilum Jaiñtia hynrei ka dei ïa ka jylla Meghalaya baroh kawei bad ka long ban ïohi ba ngi la ïaid lang ryngkat,” ula bynrap.
Haba ai khublei ïa ki paidbah jong ka Gambegre na ka bynta ka jingkyrshan bad ka jingshaniah jong ki ha ka elekshon ba dang shen, u Sangma u la ong, “kane ka Constituncy lehse ka dei kawei na ki Constituency kaba kham eh na ka bynta jong ngi khamtam ha ka thaiñ rilum Garo namarba ha ki saw tylli ki elekshon ba ladep, ngim pat ju jop na kane ka Constituency bad ngi la ju poi tang ha ka kyrdan kaba lai.”
“Ka la long ka elekshon kaba jwat bha bad hynrei nga ai khublei ïa baroh kiba la kyrshan bad trei na ka bynta jong ngi ban jop ha kane ka elekshon bad ngi la ïoh jingkyrshan na baroh ki liang,” u la ong shuh shuh.