Shillong Nailar 06: Ka khubor ba la ïoh la ïathuh ba ka kynhun Hindu-Kutumba Surakshya Parishad (KSP) ha ka sngi Ba-ar, ka la byrngem ban pynlong da ka jingpakhang surok pyrshah ïa ka Meghalaya ban pynpaw ïa ka jingpyrshah halor ka jingkhang ïa ki riewngeit Hindu ba kin leit lehniam bad duwai ha krem Mawjymbuiñ, Mawsynram.
Ha ka taïew ba la dep, ka Dorbar Shnong Mawsynram ka la rai ban nym ailad ïa ki riewngeit Hindu ba kin wan lehniam hapoh ka Krem, kaba la bna nam namar ka jingwan dur ki maw ha ka rukom kaba ki riew ngeit Hindu ki ngeit ba dei ka dak u “Shiva”.
Haba kren sha ki lad pathai khubor ha Guwahati Press Club ha ka sngi Ba-ar, u President ka KSP Satya Ranjan Borah ula ong, “Ngi donkam ïa ka jubab na ki bor khmih ka Jylla Meghalaya, lem kumta, ka Sorkar Meghalaya kan mad ïa ka jingiakhih hangne ha Assam, lehse kaba lah ban dei ka jingpakhang ïa ka surok sha Meghalaya lyngba ka Jorabat (Guwahati), Paikan (Goalpara) bad kiwei kiwei ki surok”.
“Ngi dang shu pynsngew ïa kaei kaba ngin leh pyrshah ïa ka jinglong pyrshah ïa ki Hindu. Lada ngi sdang ban leh eiei, kin ym ïoh por satia wat ban khohreh,” ong u Borah.
U Borah ula ong ba ka Ophis u Myntri Rangbah Duh ka Ri India bad ka Ophis u Secretary General ka United Nation, ki dei ban kylli ïa u Myntri Rangbah ka Meghalaya ban pynshai ïa ka nongrim jong ka Sorkar Jylla.
“Ngi kyntu ïa ka Sorkar Meghalaya ban weng noh mardor ïa kane ka jingkhang bad ki dei ban da pynbeit bha ïa ka jingwan mane ïa u Shiv Ling da ki paid Hindu ban rakhe ïa u bnai ba kyrpang ba la tip kum ka Shraban,” ula bynrap.
U Borah ula ong “Ka krem Mawjymbuiñ ka don ïa u maw ba wandur kum u Shiv Ling bad ka dei ka jaka mane bad ka Sadhana ki Hindu kaba im ha Meghalaya. bun bha ki riewniam Hindu ki ju leit sha kane ka jaka ban leh niam manla u snem khamtam ha u bnai ka Shravan”.
Ha kaba ïadei bad kane na ka liang jong u Nongïalam ka seng Hindu ula buh jingkylli ruh da kaba ong, “La ïohi ba bun bha ki briew kiba dei ki paid Khristan bad katto katne ki Sengbhalang jong ka Jylla ba synshar da ki Missionary Khristan, kila khang ïa ki riewngeit Hindu ban leit mane Blei hangtei. Hato kane ka dei ka kamkai”.
