Lada ka sorkar kam pynurlong ïa ki jingdawa, ka thma kan nang jur, yn klang ka ding ha ka jylla: KSU

Khliehriat, Nailar 11: U President jong ka Khasi Students Union Central Executive, u samla Raymond Kharjana, haba kren ha ka jingïalang paidbah ba la pynlong mynta ka sngi ha Khliehriat, East Jaiñtia Hills District, u la ong ba hadien ka 15 tarik jong mynta u bnai lada ka sorkar kam pynurlong ïa ki jingdawa jong ka seng, to tip ba ka thma kan nang jur bad nang shyrkhei ha kaba ka seng kan sa pynbeit da ki jingïakhih bapher bapher bad ka ding kan klang ha kylleng ki jaka hapoh ka jylla.
Shuh shuh utei u nongïalam ba rangbah ka KSU u la ong ba ha kato ka sngi ba long public hearing la ai lad tang ïa kito kiba kyrshan ïa ka Shree Cement katba ïa kito kiba pyrshah ïa ka public hearing pat kynthup ki dkhot ka KSU ym shym la ailad ïa ki ban leit bad ki la mad pynban tang ka jingshah tied shah bom, ka jingshah kawang tesar gas, ka jingshah lynthem ïa ki kali, u la ong ruh ba ka seng ka ieng ha ka nongrim kaba skhem bad dei halor kane ka nongrim ba ka seng ka dawa ba dei ban pynduh pyndam ïa ka public hearing jong ka Shree Cement, ban pynsajia ïa u DC, u SP bad ki heh ka tnat MSPCB.
Ha kawei pat ka bynta ba la dawa da ka seng, u samla Raymond Kharjana, u la ong, “ka mat ba la ïakren man ka por ka dei ka MRSSA, haba kren ïa kane, kam mut ba ka seng kan shu klet noh ïa ka ILP, hynrei ka seng ka ong ba katba ka jingpeit bniah jong ka sorkar pdeng ka dang ïaid ha kaba ïadei bad ka I.L.P ka sorkar ka dei ban pyntreikam shwa mardor ïa ka MRSSA”
Ki san tylli ki mat jingdawa ba la kren bad pynshai ha ka jingïalang ba la pynlong ha Khliehriat ki long ba ka seng ka dawa ba ka sorkar kan pyndam noh ïa ka public hearing jong ka Shree Cement, ban suspend noh ïa u Deputy Commissioner bad Superintendent of Police ka East Jaiñtia Hills District lem bad ki heh sorkar jong ka tnat Meghalaya State Pollution Control Board.
Ha kajuh ka por ki nongïalam jong ka KSU ki pan ka jingiatreilang jong baroh ki para doh para sam da kaba ong ba ” watla ngi long ka jaitbynriew kiba tang shi troh hynrei lada ngi long shitylli kane ka shi troh ka jong ngi ka lah ban pynkhyllem ïa ki paia jong ka Secreteriat ha Shillong”
Haba kren halor ka mat ba ïadei bad ka mat jingdawa ba ïadei bad ka thungkam thungjam u General Secretary KSU seng kmie, u samla Reuben Najiar, u la ong ba man ka por na ka liang jong ka seng ka ju dawa ba ka thungkam thungjam ka dei ban long kaba khuid hynrei ka long kaba sngewsih ba watla ki samla ki la pass ne pyndep ïa ki exam bapher bapher ki la dep ialeh ïa ki exam kam hynrei ha kaba kut pat lada ym ithuh ïa ki myntri sorkar, lada ym ithuh MLA bad lada ym lah ban pynbiang ïa ka song pisa sha ki ka kam ka jam kim ioh.
Kum ban shu pynkynmaw hangne ba kiwei pat ki mat jingdawa jong ka KSU ki long ban pyntreikam bad pynurlong noh ïa ka Meghalaya Residents Safty & Security Act (MRSSA) 2016, pynurlong noh ïa ka jingpynkylla (amendment) ia ka Meghalaya Identification Regisrtration (Safty Security) of Migrant Workers Act 2020, ban pynbeit noh ïa ki jingeh ha ka thungkam thungjam jong ka NIRGRIMS, ban pynlong ïa ka rukom thungkam kaba shai, kaba hok bad kaba khuid da kaba pynduh noh ïa ka personal interview, kumjuh ruh da kaba wanrah jingkylla ha ka MSPCB bad DSC, ban thaw ïa ka Standard Operation Procedure (SOP) na ka bynta baroh kiwei pat ki Recruitment Board.
Na ka liang u General Secretary jong ka Hima Sutnga Youth Federation, u samla Samanbha Supooh uba la don lang ha ka jingialang ha Khliehriat u la ong ba ka Hima Sutnga Youth Federation ka ai ka jingkyrshan kaba pura ïa ka KSU ha kaba ïadei bad ki san tylli ki mat jingdawa, shuh shuh u la ong ba “Lada ki bor pulit ki pyrshang ban thombor ïa ngi ha ka por ba long public hearing ka Shree Cement kan eh aiu ïa ki ba in pyrshang da kane ka juh ka buit ban ioh ban tih ïa u Uranium ha West Khasi Hills District, ngi dei ban kyndit bynriew ngi dei ban long shi tylli ban ialeh pyrshah ïa kano kano ka bor kaba pyrshang ban thom bor ïa ngi”
U samla Samanbha Supooh u la kynthoh jur ruh ïa u Superintendent of Police ka East Jaiñtia Hills District da kaba ong” Balei u SP um pyndonkam da ka bor kaba la pynkup ha u, balei u dang sngap bad long ñiangkohnguh ïa kiwei haduh katne?, ngi ki paidbah kiba don hok ban leit pynsgew ïa ka jingsngew jong ngi ha public hearing hynrei khlem iohlad ban leit, shi sngi shuwa ka public hearing ngi la dep ïakynduh ïa u DC ngi la ong ba ngi kwan ban poi sha ka jaka ba long public hearing, na ka liang u DC u la ong ba ngi lah ban leit bad yn nym don ba khang, hynrei ynda ngi mut leit ki la don bun jait kiba khang lynti ïa ngi, don kiba buh maw, buh dieng, kumta ha kaba ïadei bad ka public hearing ngi ai ka jingkyrshan ba pura ïa ka KSU” ong u samla Samanbha Supooh.
Kiba la ai jingkren ha ka jingialang ki kynthup ruh u President KSU East Jaiñtia Hills District Unit, u bah Streamly.S.Suchen, u President KSU West Jaiñtia Hills District, u bah Laitphar Syngkrem, la ioh ruh ka jingkren na ki ar ngut kiba napoh elaka Nongkhlieh, ïa ka jingialang la pyniaid da u General Secretary KSU East Jaiñtia Hills District, u bah K.S.Suchiang.
Ha kane ka jingialang ha Khliehriat la wan ban ïa shimbynta lang da ki sengbhalang bapher bapher ba kynthup naduh ka JNC, ka JSU, FKJGP bad kiwei kiwei, kumjuh ruh ki longkmie longkpa lem bad ki nongshong shnong kiba napoh elaka Nongkhlieh.