U Rahul u ieid tang ïa ki samla ba ïakhih ha Jantar Mantar, hynrei khapbrip khmat ïa ki samla ha Jharkhand: BJP

Shillong, Nailar 11: Watla u Myntri ki Kam Pohïing u Amit Shah ula long uba kloi ban jubab ïa baroh ki jingkylli ha Ïing Dorbar Thaw Aiñ hynrei ka seng congress hapoh ka jingïalam u Rahul Gandhi kam shym la ailad satai ïa ka Dorbar ba kan ïaid beit da kaba pynthut da kumne kumtai man la ka sngi, kynnoh u General Secretary ka BJP Meghalaya u Bah Wankitbok Pohshna haba kren sha ki lad pathai khubor ha ka sngi Baar.
U Bah Pohshna u ong ba nyngkong u Rahul Gandhi ula dawa ba u Myntri ba peit ïa ka Pule Puthi u Dharmendra Pradhan u dei ban iehnohkam, nangta ula dawa ruh ba dei ban ïatai halor ka NEET ha Ïingdorbar bad ka sorkar ym tang ba ka la ailad ban ïatai ïa kane ka phang, hynrei ka wanrah syndon da ki kyndon kiba pyrkhing shuh shuh ïa ka rukom pynlong eksamin ha ka ri.
U la ong ba ka sorkar ka la shim khia halor ka jinglait tuh ki jingkylli ha ki eksamin baheh bad ka la pynkiew ïa ka jingpynshitom lada lap ïa kiba leh bakla.
U la ïathuh ruh ba naduh ba la sdang ïa ka dorbar lyuir ha u bnai Naitung ka sorkar ka la plied lut ki lad ki lynti ban don ka jingïatai halor ki mat kiba bun khamtam ha ban wanrah shuh shuh ïa ki aiñ bapher kiba donkam hapoh ka ri hynrei ka liang pyrshah ba la ïalam da ka seng Congress kam shym la ailad satia. Kane ka pynpaw shai ïa ka jingleh bymsuidñiew jong ka seng Congress bad ka jingbymburom shuh ïa ka Ïing kyntang jong ka ri ka Parliament ha kaba ki nia ki jutang kim dondor shuh namar ka jingleh arsap jong ka seng Congress hapoh ka jingïalam u Rahul Gandhi.
U la kynthoh ruh ba ha Delhi mynba dang ïakhih ki samla pule halor ka jinglait tuh ki jingkylli por ka NEET ka seng Congress ka la pyni ba ka ïeng ryngkat bad ki samla pule hynrei ha ka jylla Jharkhand ba ka synshar lang bad ka JMM pat kajuh hi ka seng Congress ka khapbrip khmat ha ka por ba ki samla ba ïakhih halor ka jyrsieh thungkam jong ka JPSC ki shah bom shah tied bad shah siat tear gas.
U la ong ba kane ka pynpaw shai ïa ka jingarsap ki nongïalam ka seng Congress kiba kloi ban ïalam bakla ïa ki paidbah wat ban pynsngewthuh bakla ruh ïa ki aiñ bapher sha ki paidbah tang ban burieh ïa la ki jingduna jongki. Ha jaka ba kin long kita ki dkhot liang pyrshah ban ailad ban don ka jingïatai hapoh ka ïing dorbar phewse ka seng Congress bad u Rahul Gandhi ki phet ïamrem pynban.
Kumta, kum ka seng BJP u la ong ba ka dawa ba u Rahul Gandhi bad ka seng Congress ki dei ban panmab mardor na ki paidbah ka ri halor ka jingïalam bakla jongki bad ka jingbym ailad ïa ka Parliament ba kan treikam katkum ka rukom kaba dei namar ym tang ba syrwa ei ka por, syrwa ruh ka pisa khajna jong ki paidbah. Namar ka Parliament ka dei ka jaka ban ïatai ïa ki jingeh jong ki paidbah ym tang ban pynklumar basa khoi kumba kwah ka seng Congress.