Bynñiaw ki nongïalam TVWPS bym phai khmat ka sorkar, katba pynlong ïa ki tamasa ba heh ha ka jylla

Nongpoh, Naiwieng 21: Ka kynhun jong ka Tyrso Valley Wildlife Protection Society kala pynkut noh ïaka tamasa 6th Mini Amur Falcon Festival ba la pynlong ha madan ïalehkai jong ka Shnong Tyrso. Kane ka tamsa lehkmen kaba long ruh kum shibynta ban pynkynmaw ban pynneh pynsah ïaki sim kbeit kiba la tip kum ki Amur Falcon kaba na ka liang katei ka kynhun ka ju pynlong shisien shi snem.
Ha kane ka tamasa na ka liang ki nongpynïaid ki la ioh ruh ban pynlong ïa ki jingïakop bapher bapher na ka bynta ki nongshnong shnong jong katei ka thaiñ ha kaba ha ka sngi pynkut ki la ioh ruh ban sam ïaki khusnam sha ki nongjop haki jingïakop bapher bapher. Ha kane kajuh ka sngi na ka liang ka TVWPS ki la pynkup burom ruh ïaka samla Sara Ronghang kaba dei ka thei ïakhun karate kaba la wan rah nam bad burom da kaba khur ïa ka takma ksiar ha North East Olympic Game kaba dang shu dep long ha nongbah Shillong.
Ha katei ka jingpynkut ïaka Mini Amur Falcon Festival kaba 6 la wan ban ïa don bynta lang da u Dr. Jemino Mawthoh General Secretary ka UDP uba la shim ïaka bynta kum u kongsan haka jingïadon lang da u bah Baïahunlang Makdoh, kyrtong UDP Mawhati, Dr. Saralin Dorphang Kyrtong TMC Mawhati, u Bah Rojen Sten, Sordar Tyrso Pyllun, Samla Banjop Maring, Education Secretary, KSU NKHD, Bah Alfon Kharsyntiew Secretary HFU, L.S Bey Chairman ERDC, Bah Alos Nongpoh, General Sereatary ka TVWPS, ka samla Sara Rynghang Karate Gold Medalist NEOG, ki samla, ki longkmie bad ki riew rangbah jong katei ka thaiñ.
U Bah Alos Nongpoh kum u Secretary ka TVWPS u la kren bynñiaw ruh ha kawei ka liang ba ha kaba ïadei bad ka jingpynlong ïa katei ka tamasa ka sorkar kam shym la phai khmat lem kumba ka seng ka don jingthmu ban pynneh pynsah bad ïada ïakitei ki jait sim, katba ka sorkar ka pynlong ïa kiwei ki tamasa kiba heh haka jylla bad kyrpad ruh sha ka sorkar ba ka dei ban phai khmat lem ban pynlong ïaki tamasa kiba heh ha katei ka thaiñ ban sumar bad ïada ïa kitei ki jait sim.
Haba kren ha katei ka sngi na ka liang u Bah Jemino kum u kongsan u la pynpaw ka jingsngew nguh kaba khraw ïa ka kynhun TVWPS ba ka la pynlong ïa kane ka tamasa bad kum juh ruh ïaki nongseng jong katei ka kynhun da ka jingthmu ban ïada ïa kine ki Kbeit. U la ong ruh ba lyngba ka jingiohi jngai jong ki nongïalam jong ka TVWPS ngi ngeit ba hadien ki 60 snem ruh ngin dang ioh ban pynlong ïa kane ka Amur Falcon Festival.
Shuh shuh u la ong, ki jingthung ki jingtep bad ki mrad ki mreng kidei ki jingthaw ba la ai sngewbha da u Blei bad mangi kum ki briew ngi dei ban sngewthuh bha ïa kane bad ngim dei ban pynjot lane pynduh jait ïaki. U la ong ruh ba lada ka jylla ka jong ngi ka la long lypa kaba riewspah haka mariang, hynrei kaei pat ka bynta jong ngi ban ai kylliang ïaka mariang.