Bym poi surok surok sha kiba bun ki shnong ha ka thaiñ 12 shnong sohsat ki paidbah

Shillong,Risaw 09: Wat hadien 50 snem ba ngi la ïoh ïa la ka jong ka jylla ba pura hynrei kiba bun bah ki shnong ha ka jylla kiba ym pat ïoh ïa ka surok bad ki lynti synkien kiba biang na bynta ka kit ka bah, ki jaka sumar bad ka bor ding ilektrik. Ha ka jinghiar leit jurip jong ki nongthoh khubor sha ki thaiñ war 12 shnong kaba don sha ki thaiñ Sohra la lap ba ki don haduh 7 tylli na kita ki shnong ba kynthup ïa ka Mawmang, Sder, Maïong, Mawsohmat, Khohber, Warbah bad ka Tluh ki dei kiwei napdeng ki shnong kiba ym pat don satia kine ki jingdonkam ba ha khmat eh na bynta ki nongshong shnong kane ka thaiñ.
Ha ka jingleit hiar sha kane ka shnong la lap ba ki nongshong shnong kane ka thaiñ ki hap ban ïaid da ka kjat da ki bun bun kynta na bynta ban poi sha Kongthong ka shnong kaba jan tam napdeng ki shnong kiba la poi surok na bynta ban leit siew leit tda ne wat ban leit sha ki jaka sumar wat tang ïa ka jingshitom ba malu mala ruh.
Haba ïakren bad ki katto katne ngut ki paidbah ba ïaleit ïawan lyngba kawei ka lynti ïaid kjat kaba pynïasoh ïa ka shnong Kongthong kaba la don surok bad ki 7 tylli ki shnong kiba haduh mynta kim biang wat ïa ka lynti ïaid kjat ruh ki ïathuh ba kane ka jingbym don surok haduh mynta ka buh jingeh bha ïa ki paidbah khamtam ban kit marbam bad ban leit shim dawai.
Uwei na ki rangbah napoh ka shnong Sder u ba dang kit synsar ula ïathuh ba wat haka rta ba 48 snem u dang hap ban kit synsar ba u dang hap ban ïaid palat 5 kynta ban leit bad wan namar haduh mynta kane ka shnong kam don ïa ka surok.
Une u rangbah u ïathuh ba ka shnong Mawmang ne ka shnong Sder ka dang don shibun ki jingdonkam hynrei ïa kane ki paidbah kumba long mynta kim da donkam than eh ïa kiwei ki kam pynroi palat ïa ka surok.
“Watla ngi mad shibun ki jingeh ha man la ki shnong hynrei ngim kynnoh ïano ïano ruh namar khlem ka surok ka long kaba eh ïa ki paidbah ban pdiang ïa kiwei ki jait kam pynroi hapoh ki shnong hynrei kum ha kane ka juk mynta, kum ki nong shong shnong ka thaiñ Mawmang bad kiwei pat ki ki shnong, ngi kwah ba ka sorkar kan ïaleh ban pynïoh surok noh hapoh kane ka thaiñ” la ong u rangbah napoh ka shnong Mawmang.
Kawei ka longkmie kaba la ïalam bad la ki khun ban leit shim dawai, ka la ïathuh ba ka la mih napoh ka shnong Mawmang haduh 8 baje mynstep ban leit shim dawai na Kongthong Sub-Centre bad kan shim por kumba 2 kynta shiteng ban poi shapoh kane ka jaka shim dawai.
Kane ka longkmie kala ïathuh ba ka jingbym don surok ka buh jingeh ïa ki paidbah ym tang ban kit ïa ki marbam hynrei wat ban ïoh ki lad jingsumar namar ki 7 tylli ki shnong hapoh kane ka thaiñ kim don ki jaka sumar.
“Hooid ki don ki ASHA kiba ai dawai lada pang malu mala hynrei lada donkam ban leit phah sumar sha ki jaka sumar, ki paidbah ki hap ban kit ïa ki nongpang ha ki khoh ne shuki kumba 2 kynta tam ban poi sha Kongthong ban shim kali pat ban poi sha Khrang PHC lane da ka kali sha Shillong” la ong kawei ka longkmie.
Na ka liang u Sordar ka Raid Mawmang u Bah Arman Majaw u la ïathuh ba ha ka jingshisha ki Sordar bad ki rangbah shnong jong ki 7 tylli ki shnong naduh ki snem ba la dep ki la dep ban phah ki jingthoh sha ka sorkar hynrei haduh mynta kine ki jingthoh ki la shu sahkut tang ki jingthoh watla ka jylla Meghalaya ka la dap 50 snem.
U Bah Arman u ïa ïathuh ba kine ki shnong ym tang ba kim don ka surok hynrei ki dang sahdien shibun bha khamtam haba ïadei bad ki lad jingsumar, ki skul, ka bording bad ka skhim sam um.
“Haduh mynta kine ki shnong ki im daka ba rep kum u synsar bad kiwei ki mar rep hynrei kine ki shnong ki ïoh kam ïoh jam ruh lyngba ka skhim Mahatma Gandhi National Rural Employment Guarantee Act (MGNREGA)” la ong u Bah Arman.
Haba kylli halor ki sienjam kiba na ka liang ki nongmihkhmat ki la shim na bynta ban pynïoh surok, u Bah Arman u la ong ba kaei kaba ki kyrtong ki kular ka hynrei kaei kaba ki la leh pat ka long mar khongpong pat ynda ki la jop.
U la ïathuh ruh ba ha ka jingshisha ha ki khyndiat snem kiba la dep ka la don ruh ka Rope Way kaba la pynpoi ha ka shnong Mawmang hynrei na ki daw ba ym don ba pynbha ka la duh la katto katne snem mynshuwa.
Haba ïadei bad ka jingbym pat ïoh surok kane ka thaiñ, uwei na ki riew rangbah napoh ka shnong Mawmang u Bah Syiem Khongsit u la ïathuh ba ha ki bnai ba la dep ki paidbah na ki 7 tylli ki shnong ki la kynduh ïa u MP ka Rajya Sabha u Rakesh Sinha ban pan jingïarap haba ïadei ba ka jingpynpoi surok noh sha kine 7 tylli ki shnong.
“Nga la don bynta haduh 13 sien ha ka ilekshon MLA bad dei namar kane nga ong ba ban ïa ki MLA bad ki nongmihkhmat llajong ka dang lah ban shaniah u Prof Rakesh Sinha MP Rajya Sabha MP ban pynïoh surok hapoh kane ka thaiñ namar une u MP wat la u dei na kawei pat ka jylla hynrei u dang wan jngoh ïa kane ka thaiñ bad pyrshang ha la ka bor ban pynïoh ïa ki kam pynroi” ong u wei na ki riew rangbah ka shnong Mawmang.
U la ong ba na ka liang u Rakesh Sinha u la kular ban ai bun ki skhim pynroi hynrei na ka liang ki paidbah ki la pynsngew sha u MP ba ka jingdonkam eh naka bynta kane ka thaiñ kadei hi ka surok.
“Kam myntoi than kita ki kam pynroi bad kam da don jingmut ruh katba ngim pat ïoh ïa ka surok namar ban leh ïa kino kino ki kam pynroi kaba donkam tam eh hi ka dei beit ka surok bad kiwei lei kin bud hi” la bynrap lang u Bah Arman.
U Bah Arman u la ong ruh, “Wat ki kam pynroi kiba ngi ïoh bunsien ki pulom na ka daw ka jingbym ïoh surok” bad bynrap “Phin peit kum ïa kane ka skhim shna ïing ne ka Pradhan Mantri Awas Yojana(PMAY) kaba la mang ban pyntrei lyngba ka skhim MGNREGA ha kaba kawei ka ïing la mang kumba 1.3 lak bad ka sngi trei kumba 85-95 sngi, mutdur kum ma ngi bym don surok ngin pyllut ka pisa ban thied tiar thied tar ne ban siew bainong kit ïa ki mar kiba donkam ban ïoh shna ïa ka iing namar tang ka sngi ba mang ka sorkar kam pat long ïakren satia. Namarkata kaba donkam hi ka ong ka surok ban khring ïa baroh ki kam pynroi.”
Ki marbah kum u khaw ruh ban pynpoi sha shnong kin hap ai nong ba kin kit bad ngin hap siew ha ka dor 300-500 tyngka na man ka 50 kilo bad ka long kumjuh ruh ïa kiwei pat ki marbam bad ki tiar ki tar ïathuh kine ki nongshong shnong.
Haba ïakren bad ki katto katne ki riew rangbah bad ki longkmie jong kane ka thaiñ ki la ïathuh ba kumba long hi ka kam ba ki trei ka dei ban rep shynsar hynrei na ka daw bym poi surok ha ka jaka ban kham im ja kaba bun na ka pisa ba ki die hap siew bai nong ïa kiba kit ban pynpoi sha ka jaka ban die kaba na man ka shi kilo kin hap siew baikit ka long hapdeng ka 10-20 tyngka.