Guwahati, Risaw, 09: U Myntri ka tnat Kam Pohing ka Sorkar Pdeng u Amit Shah u la kyntu ïa ki Myntri Rangbah jong ki jylla ka thaiñ Shatei Lammihngi ba kin pyndonkam ïa ki jingtip ba la ai da ka North East Space Application Centre (NESAC) ka ban ïarap na ka jinglynshop ka jingshlei um, ka jingpynbiang ïa ka um ha ki jaka rep, ki kam jngohkai pyrthei, ka jingthung dieng bad ki kam rep.
U la ong ba ki Myntri Rangbah jong ki jylla kane ka thaiñ ki dei ban thung ïa u Nodal Officer ban ïatreilang bad ka NESAC khnang ban ïoh pyndonkam bha ïa kane ka rynsan.
Kane ka jingai jingmut jong u Amit Shah ka la long ha ka jingïalang kaba 70 jong ka North Eastern Council (NEC) kaba la long ha nongbah Guwahati, Assam ha ka sngi U Blei.
U Amit Shah u la ong ba ki don lai tylli ki jingeh kiba heh kiba la don da ki phew phew snem ha ka jingïaid lynti ka thaiñ Shatei Lammihngi sha ka roi ka par–ka jingthombor ki kynhun lehnoh, ka jingduna ki lynti Rel, ki surokbah bad ka jingpynïasoh lyngba ki kad Liengsuiñ bad ka jingbym don ka jingtrei borbah na ka bynta ka roi ka par jong ka thaiñ da ki Sorkar kiba rim.
“Hynrei hapoh ka jingïalam jong u Myntri Rangbahduh, u Narendra Modi, ka Sorkar India ka la shim shibun ki sienjam ha kine ki phra snem ba ladep ban wanrah ïa ka shongsuk shongsaiñ ha ka thaiñ Shatei Lammihngi, ban kyntiew ïa ki lad pynïasoh bad ban peit bniah ïa ka roi ka par jong kane ka thaiñ,” ong u Shah.
U la ong ruh ba baroh kawei ka India ka ithuh ba ka ktien, ka deiriti, ka bam bad ki riam jong ka thaiñ Shatei Lammihngi kum ka pateng bad ka Sorkar u Narendra Modi ka la kut jingmut ban pynneh pynsah bad kyntiew ïa ka thymmei jong kane ka thaiñ. U la ong ba ha kine ki phra snem ba la dep, ka Sorkar ka la pyrshang ban pynbeit ïa baroh ki jingeh jong ka thain shatei lammihngi da kaba tih naduh na tynrai ïa kine ki jingeh.
U la ong ba ka Sorkar Pdeng ngeit ba ka roi ka par kaba pura jong ka ri ka lah ban urlong tang lyngba ka jingshim lang ïa baroh ki ktien jong ka ri bad ba la buh ïa ka bynta ha ka National Education Policy (NEP) bathymmai ba dei ban ai jinghikai ïa ki khynnah rit da kaba pyndonkam ïa ka ktien tynrai.
U Shah u la ong ba ka ïoh ka kot jong ka India mynta ka don ha ka kyrdan kaba san ha ka pyrthei bad ka jingpynïaid bha ïa ka pisa da ki jylla ka thaiñ Shatei Lammihngi ka long kaba donkam ban kyntiew ïa kane sha ka kyrdan kaba ar ha ka pyrthei.
Da kaba kdew sha ka jingdonkam jong ki kam rep kiba lait na ka jingpyndonkam ïa ki dawai bad ka jingpyndonkam ïa ki kam digital ha ki kam rep, u Shah u la ong ba kane ka long ka kam kaba kongsan ïa ka Sorkar India bad ka kam ban seng ïa ka Multi-state Cooperative Society da kaba pynïasoh ïa ka Amul bad san tylli kiwei kiwei ki Cooperative ban ai jingithuh ïa ki mar rep ba lait na ki dawai ka la sdang.
U la ong ba hadien ba kine ki mar ki la ïoh jingithuh, kane ka Cooperative Society kan pynthikna ïa ka jingshalan ïa kine ki mar, khnang ba ka jingïohnong kan leit beit beit sha ki bank account jong ki nongrep. U la ong ba palat 500 tylli ki Laboratory ha kylleng ka ri kin ai jingithuh ïa ka jinglong jingman jong ka khyndew bad ki mar rep ba lait na ki dawai.
Shuh shuh u la ong ba ka thaiñ Shatei Lammihngi kaba lait na ka jingshlei um bad ki drok ka long kaba kongsan bha ïa ka Sorkar Pdeng.
Ha kaba batai shaphang ki sienjam ban ïada na ka jingshlei um, u Shah u la ong ba ka jingthmu jong ki Hydro Power Plant kam dei tang ban pynmih bording elektrik, hynrei lah ruh ban pyndonkam ha ka jingïada na ka jingshlei um, nalor ka jingpyndonkam ïa ki 271 ki jaka shong um kin ïarap ban ïada na ki jingshlei um.
Ha kane ka jingïalang, la ïashim bynta lang da u Myntri ba dei khmih ïa ka tnat Culture, Tourism bad DoNER u G. Kishan Reddy bad u Myntri Khynnah ka tnat DoNER bad tnat Co-operation, u B.L. Verma, ki Lat bad ki Myntri Rangbah jong ki jylla ka thaiñ Shatei Lammihngi, ki ophisar jong ki tnat bapher bapher jong ka Sorkar Pdeng bad ki jylla ka thaiñ Shatei Lammihngi
