Mairang, Risaw 09: Ka Mairang Civil Hospital ba ju khot ruh ka Tirot Sing Memorial Hospital mynta ka la kylla long kawei na ki Hospital kaba biang bha ka rukom sumar ïa ki nongpang. Ka daw ka long ba kane ka Hospital kadei ka Hospital ba nyngkong duh ban pyntreikam ka Moduler Operation Theatre. Ka Moduler OT, katkum ka jingïathuh i Dr. Mylliemumlong, Medical Superintendent, kadei ka jaka puid kaba lait lut na ki khñiang jingpang ba ïabit bad kaba lait ruh na kano ka lyer kaba sniew kaba wan na shabar.
Ïa kane ka kamra kaba la pyndait bad buh da ki tiar bad ki kor ki bor jong kane kajuk ba mynta, la shna pynbha da ka Company ADSAR LAB na Guwahati. Ka don ki kor ki bor kiban thew ïa ka jingshit jingkhriat shapoh kamra, nangta ka kor ban pynkhuid ïa ka lyer kaba don hapoh. Ka don ruh kor Kaba lah ban ïohi ïa ka met u briew kaba long kym ka kynja xray. Ki kynroh la shna ha kata ka rukom ba ki khñiang jingpang ne ki virus kin nym lah ban rung shapoh. Hapoh kane ka kamra puid kaba la pynkhuid lut ïa ki jaiñ ki nep jong kiba rung shapoh lane kaba la sterilize bha, ka don ruh ka jaka sait kti kaba long digital bad ka jaka ban buh ïa ki jakhlia.
Hapoh jong kane ka OT la buh ruh ïa ka Recovery Room kaba ki nongshah puid kin thiah ha shuwa ban rah sha ki kamra ba ki ju thiah.
Ki don ruh ki kamrah ba ki Doktor, ki Nurse ne ki nongtrei kiba dei duty kin bujli ïa ki jaiñ ba ki phong na ïing.
U Anand Nirupam Palit, Marketing Manager kane ka Kompeni ADSAR LABS, u la ïathuh ba kine ki tiar bad ki kor ki bor ki don ka jingneh ne ka warranty kaba haduh 21 snem.
Ïa kane ka OT kaba thymmai la plie da u Bah Metbah Lyngdoh, Speaker bad MLA jong ka Mairang ryngkat ka jingïadon lang u ADC ka Eastern West Khasi Hills Bah W. Mawkon, nangta I DHS (MI) Dr. H. Lyndem bad kiwei kiwei de ki ohisar na ka DHS.
U Bah Metbah u la plie ruh ïa kamra xray bad ki kor ki bor ba thymmai, nangta ka Hospital Information System lane ka kamra bad ki kor ki bor ban ai jingtip ban pynsuk ïa ki paidbah ba wan shim dawai ne ba wan thiah bad kumjuh ruh u la plie ïa ki CCTV Machine jong ka Hosital.
Hadien ba ladep plie ïa kine ki kamra la pynlong ïa ka jingïalang ha ka Conference Room kaba la shna thymmai. Haba kren ha kane ka jingïalang u Bah Metbah u la pynpaw ka jingsngewkmen ïa ka jingkylla dur kane ka Hosital haba ïanujor bad ki snem kiba ladep. Ka daw ba kane ka Hospital ka kylla dur kadei namar ba na ka liang jong u kum u MLA, um ju tuklar ne pynwit haba ki Doktor ki leh ïa kaei kaei kaba bha na ka bynta ka Hospital bad na ka bynta ki paidbah. U la ong ruh ba ka jingtuklar jong ki Politician ha ka jingtreikam ki jaka sumar ka long kum ka jingïalehkai bad ka jingim briew. “Ban ïa kaba nga ïalehkai bad ka jingim briew, ka bha ba nga ka sangeh noh na ka kam saiñpyrthei”, u la ong.
I Dr. M. Mylliemumlong i ban sa leit shimti noh kum ka Joint Director ha DHS, I la pynpaw ka jingsngewkmen ba in mih noh na Mairang Civil Hosital hadien ba ka Hospital ka la lah ban poi sha kane ka jingangnud kaba la slem ban pynkylla dur ia ka jingtreikam ka Hosital. I la ai khublei ïa baroh ki Doktor, ki Nurse bad ki Nongtrei bad kumjuh ruh ïa ki ophisar ka DHS kiba la ïatreilang na ka bynta kane ka jingangnud bad ka jingthrang jong i ban wanrah ïa kane ka jingkylla dur ka Hospital. I kyrmen ruhba lyngba kane kan nang pynbha bad pynjanai shuh shuh ïa ka jingshakri ka Hospital ïa ki paidbah. I la ïathuh ruh ba ka jinglut na ka bynta ka jingpynbha ïa ka OT bad kiwwei ki kamra ka long 70 lak tyngka.
