U Dr. Donkupar kum u President u ïohi jngai shwa ban shim ïa ka rai : Bah Bindo
Kajuh ka apot ngat ha shwa elekshon 2008 bad 2023

Shillong, Risaw 09 : Ka dei ka sien kaba ar ba u Senior Working President ka UDP, Bah Bindo M Lanong un hap ban ïaknieh ïa ka tiket na ka party, kata ka sien ba nyngkong ha shwa ka elekshon 2008 bad ka sien kaba ar pat dei mynta shwa ka elekshon 2023.
Haba kren bad ki lad pathai khubor, u Bah Bindo u la ïathuh ba shwa ka elekshon 2008 ka jingïaknieh tiket ka la mih hapdeng jong u bad u General Secretary ba mynta ka party, Bah Jemino Mawthoh uba la leit ban kynduh ïa u President ka party ha katei ka por, (L) Dr. Donkupar Roy ban pan tiket na Nongthymmai.
“Hynrei u Dr. Donkupar Roy u la ai ka jubab ba kan khambha ban duh kawei ka seat ban ïa kaba duh ïa u (Bah Bindo). Kata kadei ka jubab ba u ai. U Dei shisha u nongïalam ba ïohi jngai,” la ong u Bah Bindo da kaba pynpaw ruh ba naduh ba u rung sha ka saipyrthei u ïai neh ha kajuh ka nongrim bad ha ka UDP.
Shuh shuh u la ïathuh ruh ba ha katei ka elekshon u la jop na Nongthymmai da kaba pynliem ïa u Bah Jemino uba ïakhun na ka tiket NCP.
Da ka jingjop ha katei ka samoi, u Bah Bindo u la ïoh ruh ban bat ïa ka shuki Lamphang jong ka Iing Dorbar Thawain ka Jylla bad ruh hadien kum u Symbud Myntri Rangbah ka jylla haduh ban da kut ka samoi.
Hynrei haba kren pat ha ka jingpynkhreh ïa ka elekshon MLA 2023 kaba u thmu ban aireng na Nongkrem u Bah Bindo u la ong ba u la rai ban aireng beit khlem kyrtiang dien shuh. “Lada ïoh ne ym ïoh tiket na ka UDP ruh ngan ïakhun beit namar ngam kwah ban shu ieh kumto ïa ki kynhun jongnga kiba la trei mynta la kumba shisnem,” u la ong da kaba pynpaw artad ba um don jingmut satia ban leit pynïasoh sha kano kano ka party.
Utei u rangbah u ba dei ruh u MDC shu ieh ha KHADC u la ïathuh ba u la ïathuh ba u la jop kum u MDC jong ka All Party Hill Leaders Conference (APHLC) naduh u snem 1972 bad u ïai neh bad ka tad haduh ba kan da khylliap ha u 1994 da ka jingthaw noh ïa ka Hill People’s Union (HPU).
U ong ruh ba u la don bynta ruh bad ka UDP kaba la thaw ha u snem 1997 hadien ba katto katne ngut ki MLA hapoh ka jingïalam jong u Bah EK Mawlong na ka HSPDP, nangta ka PDIC bad ka HPU ki la synrop lang noh kawei.
Halor ka jingkylli pat kaei kaba pynlong ïa u ban iehnoh ïa ka East Shillong bad phai khmat sha Nongkrem, utei u rangbah u la ong ba hadien ba la phiah thymmai ïa ki constituency bun na ki nongthep vote kim dei shuh ki jaidbynriew lajong bad kumta dei tang lada u pynïasoh bad ka National party lehse un ïoh ïa ka jingkyrshan jong ki.
“Kumta, lada nga ïai neh bad ka aparty riewlum nga tip ba ngan ym don jingkyrmen shuh ban jop. Tangba, ngam pat ju kylliang party bad ha ka jaka ba ngan kynthih na kawei ka party sha kawei pat nga la rai ban kylliang noh ïa ka constituency,” u la bynrap biang.
Haba pynshai shuh shuh halor ka jingartatien jong u mynta ïa ka tiket, u Bah Bindo u la ong ba haduh mynta na ka party kam shym la ïa syllok ei ei ruh bad u halor katei ka mat. U la ïathuh ba ha u Naitung mynta u snem u President ka UDP Bah Metbah Lyngdoh u la pyntip ha ka central election committee jong ka party ba ka sur kiba bun ha Nongkrem ki kham noh ka mon sha u MLA ba mynta. “Mynta kaba sah ka long sa tang ban pynbna noh ïa ka kyrteng namar ïa ka rai hi ki la dep shim.”
U ong ruh ba ka rai ban ym ai tiket ïa u ka long ka jingshet kylla khamtam nalor ba udei uwei na ki nongïalam party ba la rim bad slem tam.
“Ha ka jaka ba kin ai burom ïanga ki pynshitom pynban,” u la ong. U la ïathuh ruh ba kat haduh utei u pud ruh ym shym la don satia mano mano na ki nongïalam ka party kiban mih shakhmat ban syllok ne kren bad u kumba u ju kren na ka bynta kiba bun haba don kiba tyngkhuh ïa kum kitei ki jingjia.
Kumta, u la ong ba mynta ka sah sa tang ka rai u paidbah kaei kaban jia nangne shakhmat.