Na ka ‘App’ sdang ka Meghalaya ban siew tulop ïa ki hajar ngut ki ASHA

Mynshwa shimpor 4 bnai mynta tang 5sngi

0

Shillong, Risaw 09 : Ka sorkar Meghalaya ka kylla long kawei na ki jylla ban sdang siew tulop ïa ki ASHA kiba don ha ka jylla lyngba ka App ba la tip kum ka ‘ASHA Payment App’.
Lyngba katei ka App, mynta ki la don haduh 7000 ngut ki nongtrei ASHA kiba la ïoh beit beit ïa ki jingsiew ha ki account jong ki.
Katkum ka kyrwoh na ka tnad ka Koit ka Khiah la ong ba ka jingsiew ïa ki ASHA kiba dei ki nongtrei ba hakhmat eh ka koit ka khiah ha ki shnong ki thaw, ka long katkum ka jingtreikam jong ki ha kaba ki hap ban kdew (claim) ïa ki kam ba ki trei man la u bnai.
“Mynshwa ka rukom siew ka slem bha na ka daw ka jingjrong palat ka rukom treikam. Dei na kane ka daw ba ka sorkar jylla ka la pyntreikam noh da ka ASHA Payment Application ban pynsuk bad pynstet ïa ka rukom siew sha ki ASHA. Kumta hadien ba la dep ban pyllait 80 klur tyngka ka jingsiew kaba sahteng, na ka liang u Myntri Rangbah ka jylla ryngkat ka tnad ka koit ka khiah ki la buh ïa ka thong ba ka jingsiew ïa ki ASHA kan long tikna noh nangne shakhmat khlem pynslem shuh,” ong ka kyrwoh.
Haba pynpaw ïa kane, ka Kong Happy Makdoh, kawei na ki ASHA ba hap ha Mawroh PHC ka la ong, “Nga dang shu dep phah ïa ki kam kiba nga trei mynta u bnai lyngba ka phone jongnga hi.” Shuh shuh ka ong ruh ba lyngba katei ka App ka jingsiew ki ïoh noh tang hadien san sngi. Shwa kane, ka la ong ba ki ASHA ki hap ban ap da ki bnai ki bnai ban ïoh ïa kitei ki jingsiew bapher bapher kaba ju poi haduh u pud ba ki hap ruh ban mih madan.
Lah ban kdew hangne ba ïa katei ka ASHA App la pyntreikam ha ka jylla baroh kawei naduh u Lber mynta u snem bad haduh mynta ki la don haduh 7067 ngut ki ASHA kiba la dep ban rejistar ha katei ka App. La pyntip ruh ba napdeng kitei ki la don haduh 6915 ngut kiba la dep ban ïoh ïa ka jingmynjur bad kumba 9.13 klur tyngka ka pisa la dep ban pyllait haduh mynta.
Katkum ka jingïathuh da u Mission Director, National Health Mission, u Ramkumar S, IAS la ong, “Ka rukom treikam kaba rim ka long kaba jrong bad shimpor bha bad ka don ruh bun ki kyndon kaba poi haduh u pud ba ka jingsiew ruh ka slem. Mynshwa ka jingsiew ïa ki ASHA ka shimpor haduh 120 – 150 sngi hynrei da kane ka App mynta ka jingsiew kan shim por tang hapoh 5-7 sngi,” u la ong.
Nalorkata, u ïathuh ruh ba nalor ba ka rukom siew ka long kaba kloi ka pyntikna ruh ïa ka rukom siew kaba khuid namar la phah beit beit sha ki bank account jong ki ASHA. U la ong ruh ba kane kan pynsuk ïa ki ophisar ha ki distrik bad ruh ha ka jylla ba kin peitngor khnang ba ka jingsiew kan long beit ha ka por.
La pyntip ruh ba ïa ki jingtip kiba kham bniah lah ruh ban peit da kaba ïaid lyngba ka website jong ka www.meghealth.in na ka bynta kino kino kiba kwah ban tip shuh shuh.
Haba bynrap shuh shuh, ka ASHA na Mowtyrshiah, West Jaintia Hills, Kong Judis Shadap ka la pynkynmaw ba kumno mynshwa ki hap ban ap slem slem bha ban ïoh ïa ka jingsiew hadien ba ki la phah ïa ki jingtreikam jong ki sha ki ASHA Facilitator. Hynrei mynta pat ka la ong ba ka lah ban phah ïarap wat ha ka khun ruh ban pyntip ïa ki jingtreikam jong ka lyngba katei ka App.
“Ngam pat da lah bha ban kam ïa ki jingsiew jongnga lyngba ka phone bad bun ki kam nga dang trei beit ha ka rejistar hynrei ka khun pat ka ïarap ban kam ïa kine lyngba ka app,” ka la ong.
Wat hapdeng ka jingthut ki kor internet na ka liang u Piulish R Marak, District Community Process Coordinator jong ka NHM, Tura, u la ong ba bun ki ASHA ki la sdang ïa katei ka jingtreikam lyngba ka APP bad mynta ki la sngewthuh haduh katno ka pynmyntoi ïa ki. U ong ruh ba mynta ki ïoh ban tip kumno shaphang ka rukom siew ïa ki.

Leave A Reply

Your email address will not be published.