Bun ki samla kiba la ngop ha u drok, hynrei ka jingkut jingmut baskhem kan pynlait ïa ki: Brighstarwell Marbaniang

Nongpoh, Naitung, 07: Hadien shi taiew lynter ba ka Wisdom Center kawei naki jaka ai jingsumar bad syllok ïaki briew kiba la ngop haki jingdih buaid khamtam u droks, kala pynlong ïaka taiew lehkmen jong ki samla kiba la kyrni haki jingdih buaid lyngba ki prokram bapher bapher bala tip kum ka Wisdom Week 2024, katei ka shlem kala pynkut noh ïa katei ka prokram kyrpang haka sngi Saitjaiñ ha Umdihar.
Ïa katei ka wisdom week la wan ban ai mynsiem bad pynhap pyrda da u Bah Brightstar Well Marbaniang MLA ka Mawlai kum u kongsan haka jingdonlang u Pastor David Jamir Director ka Wisdom Center, Umdihar, ki samla kiba dang shah sumar ha katei ka jaka ryngkat ki bahaiing hasem.
Kum ban shu pynpaw katei ka Wisdom Week bala pynlong ha katei ka shlem ai jingsyllok bad sumar ïaki samla kiba la kyrni ha u drok bad ki jingdih buaid ka long ban pynpyngngad ïaka jingmut ka jingpyrkhat jong ki bad ban lap ruh ïaka sap kaba ki don, da kaba ki ïashim bynta haki jinglehkai sports bad ki prokram bapher bapher baroh shi taiew lynter ha kaba ki samla da ka jingkmen kila ioh ban shim bynta shitrhem.
Haba kren ha katei ka sngi naka liang u Pastor David Jamir u la ong ba katei ka Wisdom Week ka long kum ka jinghikai ïaki samla ban tip ïaka sap kaba rieh haki nmar baroh ka jingim jong ki kila pynlut por bad u drok bad kiwei ki jingdih buaid hynrei kim tip ka sap aiu kaba ki don bad lyngba katei ka shlem ai jinghikai bad kumjuh ruh kitei ki jait prokram ba ju pynlong man u snem ki samla ki lah ban pyni ïaka sap kaba ki don haka jingim jong ki bad lehse lyngba katei ka sap ki lah ban thaw thymmai ïaka jingim jong ki bad ban long ruh ka lawei jong ki.
Na ka liang u Bah Brightstarwell Marbaniang kum u kongsan haba kren ha katei ka sngi u la ai ka jingïaroh ïa u pastor David Jamir u la shimkhia ban buh kum katei ka shlem ai jinghikai ban lum ban lang ïaki samla kiba la hap haka ahor haki jingdih buaid bad ban pynlait ïaki naka jingjynjar bad ka jingksaid jong ki haka jingim ba man ka sngi.
U la ong ruh ba kum kitei ki jait jaka ai jingsumar bad syllok ïa kiba la kyrni haki jingdih buaid (Rehabilitation Center) ka sorkar kala dei ban phaikhmat ban buh ha kane ka jylla ym ban ap tang ha ki riew shimet ban sdang namar kumba long mynta ki u drok u la long kum ka jingpang haka jylla bad palat 2.50 lakh ngut ki samla kiba la ngop ha utei u jingdih buaid, bad ka jingkylli ka long shaei ka lawei jong ki samla?
Ka sorkar kala dei ban shim da ki sienjam ban buh bad ban thaw ïaki jaka sumar bad syllok ïakiba la kyrni ha u drok bad ki jingdih buaid ban pynkylla dur biang ïaka jylla Meghalaya bad pynlong kum ka jylla kaba lait nakitei ki jait jingdih kiba wanrah ka jingjot ym tang ïaka met u briew ba dih hynrei ïaka imlang ka sahlang baroh kawei, u la bynrap.